اقمولا وبلىسىندا جول قاۋىپسىزدىگىن ارتتىرۋدىڭ جاڭا ءتاسىلى – جول بولىگىن جاساندى تارىلتۋ ءادىسى ەنگىزىلە باستادى. بۇل شارا جول-كولىك وقيعالارىنىڭ سانىن ازايتۋعا باعىتتالعان جانە قازىرگى تاڭدا اپات ءجيى تىركەلەتىن ءۇش ۋچاسكەدە پيلوتتىق رەجيمدە قولدانىلۋدا. مۇنداي تاجىريبە بۇعان دەيىن ەۋروپا ەلدەرىندە تيىمدىلىگىن كورسەتىپ، ەندى قازاقستاندا دا جۇزەگە اسىرىلا باستادى.
وبلىس اكىمدىگىنىڭ مالىمەتىنشە، نەگىزگى ماقسات – جۇرگىزۋشىلەردىڭ ءجۇرىس-تۇرىسىنا اسەر ەتۋ ارقىلى جول اپاتتارىنىڭ الدىن الۋ. جولدىڭ تارىلۋى اۆتوكولىك جۇرگىزۋشىلەرىن بەيسانالى تۇردە جىلدامدىقتى تومەندەتۋگە، ساقتىقتى كۇشەيتۋگە ماجبۇرلەيدى. بۇل اسىرەسە جۇرگىزۋشىنىڭ شارشاۋى مەن زەيىنسىزدىگى سەبەپ بولاتىن اپاتتار ءجيى ورىن الاتىن اۋماقتاردا وتە ماڭىزدى.
– جول بولىگىن تارىلتۋ – بۇل جاي عانا جول بەلگىلەرى مەن سىزىقتارىن وزگەرتۋ ەمەس. بۇل جۇرگىزۋشىنىڭ جولدى قابىلداۋىنا ىقپال ەتەتىن ينجەنەرلىك ءادىس. اۆتوكولىك يەسى مۇنداي ۋچاسكەلەردە ءينتۋيتيۆتى تۇردە قوزعالىستى قاداعالاي باستايدى، بۇل جول اپاتى قاۋپىن تومەندەتەدى، – دەيدى سالا ماماندارى.جاڭا ءادىستىڭ باستى نىسانالارىنىڭ ءبىرى – كولىك تىزگىنىندە شارشاۋ كۇيىندەگى جۇرگىزۋشىلەر. مۇنداي كەزدە ولاردىڭ رەاكتسياسى باياۋلايدى، قوزعالىسى بىرقالىپسىز بولادى، ەسكەرتۋ بەلگىلەرىن ەلەمەۋى مۇمكىن. ال جولدىڭ گەومەترياسىن وزگەرتۋ ارقىلى جۇرگىزۋشى ۇنەمى نازارىن شوعىرلاندىرۋعا ءماجبۇر، بۇل ءوز كەزەگىندە جول-كولىك وقيعالارىن ازايتۋعا سەپتىگىن تيگىزەدى. قازىرگى تاڭدا بۇل جوبا وبلىستاعى ءۇش قاۋىپتى جول ۋچاسكەسىندە ىسكە اسىرىلىپ جاتىر. ەگەر ناتيجەسى وڭ باعالانسا، كەلەشەكتە بۇل تاجىريبە ءوڭىردىڭ باسقا دا جولدارىنا كەڭىنەن ەنگىزىلمەك. اتالعان باستاما – جول-كولىك وقيعالارىنىڭ سانىن ازايتۋ مەن جول مادەنيەتىن ارتتىرۋعا باعىتتالعان كەشەندى باعدارلامانىڭ ءبىر بولىگى. جەرگىلىكتى بيلىك وكىلدەرىنىڭ ايتۋىنشا، قاۋىپسىزدىك – بۇل تەك بەينەكامەرالار مەن ايىپپۇلدار عانا ەمەس، سونىمەن قاتار جول قوزعالىسىنا قاتىسۋشىلاردىڭ مىنەز-قۇلقىن وزگەرتە الاتىن ينجەنەرلىك شەشىمدەر جۇيەسى.
