دۇنيەجۇزىلىك بانك (دب) اۋعانستاننىڭ «تاليبان» ۇكىمەتىندەگى قارجى مينيسترلىگىمەن جۇرگىزىلگەن كەلىسسوزدەردەن كەيىن كابۋلداعى كەڭسەسىنىڭ جۇمىسىن قايتا جانداندىردى. بۇل تۋرالى Tolonews جاريالادى، دەپ حابارلايدى “ادىرنا”.
دەگەنمەن، بانكتىڭ رەسمي سايتىندا ازىرگە مالىمەت جوق.
Tolonews مالىمەتىنشە، دۇنيەجۇزىلىك بانك اۋعانستانداعى لوگيستيكالىق جانە قۇرىلىس كومپانيالارىنا شامامەن 50 ملن دوللار كولەمىندەگى قارىزدى وتەۋ باستالعانىن حابارلاعان. بۇل تولەمدەر ءتورت كەزەڭدە جۇزەگە اسادى جانە اۋعانستان قارجى مينيسترلىگى ارقىلى جۇرگىزىلەدى. العاشقى ترانش — 10,8 ملن دوللار، قالعان 39,1 ملن دوللار كەلەسى ءۇش كەزەڭدە تولەنەدى.
كۇتىلۋىنشە، بۇل قادامدار اۋعانستانداعى توقتاپ تۇرعان دامۋ جوبالارىن قايتا ىسكە قوسىپ، جاڭا جۇمىس ورىندارىن اشۋعا جانە ەلدىڭ ەكونوميكالىق احۋالىن جاقسارتۋعا سەپ بولماق.
ەكونوميكالىق ساراپشى مير شاكيب مير بۇل شەشىمدى وڭ باعالادى.
«رەسپۋبليكالىق كەزەڭدە جۇمىس ىستەپ، اقى الا الماعان كومپانيالارعا قارىزدى وتەۋ – حالىقارالىق دونورلاردىڭ سەنىمىن قايتا قالىپتاستىرۋعا باعىتتالعان وتە ماڭىزدى قادام»، دەدى ول.
ساراپشىلاردىڭ پىكىرىنشە، «تاليبان» بيلىگى اۋعانستان ەكونوميكاسىن تۇراقتاندىرۋ جانە دامىتۋ ءۇشىن حالىقارالىق قارجى ۇيىمدارىمەن قايتا بايلانىس ورناتۋعا بارىنشا كۇش سالۋى قاجەت.
ايتا كەتەيىك، دۇنيەجۇزىلىك بانك «تاليبان» قوزعالىسى بيلىككە كەلگەننەن كەيىن اۋعانستانعا كومەك كورسەتۋ باعدارلاماسىن ۋاقىتشا توقتاتقان بولاتىن. 2020 جىلدان بەرى بانك اۋعانستانداعى قالپىنا كەلتىرۋ جانە دامۋ
دۇنيەجۇزىلىك بانك ۇيىمىنىڭ ەرەجەسى بويىنشا، قارجىلاي كومەك تەك 189 مۇشە ەلدىڭ بارلىعى زاڭدى دەپ تانىعان ۇكىمەتكە عانا بەرىلەدى.
2025 جىلعى ساۋىردەگى ەسەبىندە بانك اۋعانستان ەكونوميكاسى باياۋ قالپىنا كەلىپ جاتقانىن، بىراق بولاشاعى بەلگىسىز ەكەنىن اتاپ ءوتتى. 2024 جىلى ەلدىڭ ءىجو 2,5%-عا وسكەن، نەگىزىنەن اۋىل شارۋاشىلىعى، كەن ءوندىرۋ جانە قۇرىلىس سالالارىنىڭ ەسەبىنەن. الايدا جان باسىنا شاققانداعى تابىس ارتپاعان، جاستار مەن ايەلدەر اراسىندا جۇمىسسىزدىق پەن ازىق-تۇلىك تاپشىلىعى ءالى دە وتكىر ماسەلە كۇيىندە قالىپ وتىر.
يمپورتتىڭ كوبەيۋى ساۋدا تاپشىلىعىن ارتتىردى، ال سىرتقى كومەكتىڭ ازايۋى ەكونوميكانىڭ وسالدىعىن كۇشەيتتى. بانكتىڭ مالىمدەۋىنشە، بانك جۇيەسى ءالسىز، ىشكى تابىس جەتكىلىكسىز. سوندىقتان شۇعىل رەفورمالار، جەكە سەكتوردى قولداۋ جانە جاستار مەن ايەلدەرگە ارنالعان جۇمىس ورىندارىن كوبەيتۋ— ەلدىڭ ۇزاق مەرزىمدى تۇراقتىلىعى مەن دامۋى ءۇشىن باستى مىندەت.
