اقمولا وبلىسىندا ءىرى مال شارۋاشىلىعى كلاستەرى قۇرىلۋدا

اقمولا وبلىسىنىڭ تورعاي اۋىلدىق وكرۋگىندە مال شارۋاشىلىعى سالاسىندا ءىرى ينۆەستيتسيالىق جوبا ىسكە قوسىلدى. «ەرەيمەنتاۋ-استىق» جشس 10 مىڭ باسقا ارنالعان بورداقىلاۋ الاڭى بار قوي ءوسىرۋ كەشەنىن قۇرۋ جۇمىستارىن باستادى. كاسىپورىن باس ديرەكتورىنىڭ ورىنباسارى قونىسبەك نۇرعازيننىڭ ايتۋىنشا، جوبا اياسىندا بورداقىلاۋ الاڭى ورنالاساتىن بازانى سالۋ جانە جاڭارتۋ، قورا-جايلارمەن قامتىلعان سەرۋەندەتۋ الاڭدارىن ۇيىمداستىرۋ، استىق قويمالارى مەن مال ازىعىن دايىندايتىن تسەح سالۋ جوسپارلانعان. سونىمەن قاتار، تراكتورلار، ازىق تاراتۋ تەحنيكاسى مەن جەم-ءشوپ وندىرۋگە ارنالعان قۇرال-جابدىقتار ساتىپ الۋ كوزدەلىپ وتىر. كاسىپورىن جىل باسىنان بەرى كاتار مەملەكەتىنە ءونىم ەكسپورتتاۋدى باستاپ كەتكەن. اقمولا وبلىسىنىڭ اكىمى مارات احمەتجانوۆتىڭ ايتۋىنشا، بۇل جوبا ايماق ءۇشىن تىرەك نىسانعا اينالىپ، تەك جاقىن ماڭداعى ەلدى مەكەندەردىڭ عانا ەمەس، تۇتاستاي اۋداننىڭ دامۋىنا سەرپىن بەرۋى ءتيىس. بۇدان بولەك، ەرەيمەنتاۋ قالاسىندا تاعى ءبىر اۋقىمدى جوبا — جىلىنا 10 مىڭ باسقا ارنالعان ءىرى قارا مال وسىرەتىن اگروونەركاسىپتىك كەشەننىڭ قۇرىلىسى قولعا الىنباق. جوبانى «Big Farm» جشس جۇزەگە اسىرادى. كەشەن جىلىنا 90 مىڭ توننا مال ازىعىن جانە 7,6 مىڭ توننادان استام ءىرى قارا ەتى مەن ەت ونىمدەرىن ءوندىرۋدى جوسپارلاپ وتىر. قازىرگى تاڭدا جوبالىق-سمەتالىق قۇجاتتاما ازىرلەنىپ، جابدىق جەتكىزۋگە كەلىسىمشارتتار جاسالعان، سونىمەن قاتار لوگيستيكالىق كومپانيامەن جابدىقتى تاسىمالداۋ جونىندە كەلىسىمگە قول جەتكىزىلگەن. مال جانە ەت ونىمدەرىن وندىرۋگە باعىتتالعان بۇل تىكەلەي ينتەگراتسيالانعان كەشەنگە قۇيىلاتىن ينۆەستيتسيا كولەمى 77 ميلليارد تەڭگەدەن اسادى. جوبا اياسىندا 380 تۇراقتى جۇمىس ورنى اشىلادى دەپ كۇتىلۋدە. سونىمەن قاتار، قىزمەتكەرلەر ءۇشىن تۇرعىن ۇيلەر سالۋ دا جوسپارعا ەنگەن. بۇل تۋرالى وبلىس اكىمدىگى حابارلادى.