اقمولا وبلىسىنداعى تۇكش رەفورماسى: كوپپاتەرلى ۇيلەردى باسقارۋ جۇيەسى قالاي وزگەرۋدە

اقمولا وبلىسىندا كوپپاتەرلى تۇرعىن ۇيلەردى باسقارۋ جۇيەسىن رەفورمالاۋ جالعاسۋدا. تكش زاڭناماسىنا ەنگىزىلگەن وزگەرىستەر تۇرعىن ءۇيدى باسقارۋدىڭ جاڭا نىساندارىن ايقىندادى، پروتسەستى اشىق ەتتى جانە پاتەر يەلەرىنىڭ ورتاق مۇلىكتى ۇستاۋعا جاۋاپكەرشىلىگىن كۇشەيتتى. بۇگىندە تۇرعىندار ءوز ۇيلەرىن قالاي باسقارۋدى تاڭداۋ مۇمكىندىگىن الىپ وتىر. ولار جينالىستارعا قاتىسادى، ءۇي كەڭەستەرىن جاسايدى، باسقارۋشى كومپانيالاردى تاڭدايدى نەمەسە مۇلىكتى كۇتىپ ۇستاۋ ماسەلەلەرىن ءوز قولدارىنا الا الادى. ۇيدەگى پاتەرلەردىڭ سانىنا بايلانىستى باسقارۋدىڭ ءار ءتۇرلى فورمالارى قولدانىلادى. مىسالى، 16 پاتەرگە دەيىنگى ۇيلەر تىكەلەي بىرلەسكەن باسقارۋدا، 30 پاتەرگە دەيىن – قاراپايىم سەرىكتەستىكتەردە، ال 30 جانە ودان دا كوپ پاتەرلى ۇيلەر مەنشىك يەلەرىنىڭ بىرلەستىكتەرىن قۇرۋى كەرەك. اقمولا وبلىسىنىڭ اۋماعىندا 30 مىڭنان استام كوپپاتەرلى ءۇي بار، ونىڭ ىشىندە 3 687-دە التى جانە ودان دا كوپ پاتەر بار. تۇرعىن ءۇي وبەكتىلەرىن باسقارۋمەن 464 ۇيىم اينالىسادى، ونىڭ ىشىندە 63 پيك، 350 وس، 794 جم جانە 59 باسقارۋشى كومپانيا بار. «كوپپاتەرلى ۇيلەردى ءتيىستى جاعدايدا ۇستاۋ ءۇشىن اكىمدىكتەر جىل سايىن ولاردى ۇستاۋعا جۇمسالاتىن شىعىستاردىڭ ەڭ از مولشەرىن بەكىتەدى. 2024 جىلى بۇل سوما اقمولا وبلىسىندا ءبىر شارشى مەتر ءۇشىن 20,85 تەڭگەدەن 65,58 تەڭگەگە دەيىن وزگەرەدى. بۇل قاراجات تەحنيكالىق قىزمەت كورسەتۋگە، تازالاۋعا، جوندەۋگە جانە اباتتاندىرۋعا جۇمسالادى«، — دەپ حابارلادى اقمولا وبلىسىنىڭ ەنەرگەتيكا جانە تۇكش باسقارماسى. تۇرعىن ءۇي قورىن باسقارۋ سالاسىنداعى باقىلاۋ اۋداندار مەن وبلىستىق ماڭىزى بار قالالاردىڭ اكىمدىكتەرىنە جۇكتەلگەن. تۇرعىن ءۇي ينسپەكتسياسى وزىنە جۇكتەلگەن وكىلەتتىكتەرگە سايكەس تۇرعىن ءۇي قورىن باسقارۋدى، قىزمەت كورسەتۋدى جانە ونىڭ جاي-كۇيىن مەملەكەتتىك باقىلاۋ فۋنكتسيالارىن جۇزەگە اسىرادى. ونىڭ مىندەتتەرىنە كوپپاتەرلى ۇيلەردىڭ جاعدايىن تەكسەرۋ، كۇردەلى جوندەۋ جۇمىستارىن باقىلاۋ، تۇرعىن ءۇي قورىن تۇگەندەۋدى ۇيىمداستىرۋ، سونداي-اق قاجەت بولعان جاعدايدا ۋاقىتشا باسقارۋشىلاردى تاعايىنداۋ كىرەدى. اقمولا وبلىسىندا تۇرعىن ءۇي قورىن باسقارۋ رەفورماسى تۇرعىن ءۇي قورىن پايدالانۋ مەن كۇتىپ-ۇستاۋ ساپاسىن ارتتىرۋعا جانە تۇرۋ جاعدايلارىن جاقسارتۋعا باعىتتالعان. الايدا، كوپ نارسە تۇرعىنداردىڭ وزدەرىنە بايلانىستى: ولاردىڭ جينالىستارعا بەلسەندى قاتىسۋى، باسقارۋشى كومپانيالاردىڭ جۇمىسىن باقىلاۋ جانە شىعىنداردى ۋاقتىلى تولەۋ. تەك بىرلەسكەن كۇش-جىگەرمەن عانا ءوڭىردىڭ كوپپاتەرلى ۇيلەرىندە ءتارتىپ پەن جايلىلىقتى قامتاماسىز ەتۋگە بولادى.