قازاقستاننىڭ تۇڭعىش ءباسپاسوز جانە بۇقارالىق اقپارات ءمينيسترى قۋانىش سۇلتانوۆ مەملەكەتتىك ناگرادامەن ماراپاتتالدى. بۇل تۋرالى بۇگىن اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«پرەزيدەنت قاسىم-جومارت توقاەۆتىڭ جارلىعىمەن مەملەكەتتىك جانە قوعامدىق قىزمەتتەگى ايرىقشا ەڭبەگى ءۇشىن قۋانىش سۇلتانۇلى سۇلتانوۆ «وتان» وردەنىمەن ناگرادتالدى»،—دەلىنگەن حابارلامادا.
ايتا كەتەيىك، بۇگىن قۋانىش سۇلتانوۆ 80 جاسقا تولىپ وتىر. ول — "قارلىعاشتار", "جاستاردىڭ اياق الىسى", "قازاقستان كومسومولى", "ۋاقىتپەن بەتپە-بەت". "قازاقستان-قىتاي: تاريح جانە قازىرگى زامان", "قازاقستان-قىتاي: قۇجاتتار مەن ماتەريالدار جيناعى", "الىپتىڭ ويانۋى (قىتاي رەفورماسى تۋرالى وچەركتەر)" كىتاپتارىنىڭ اۆتورى.
1991-1993 جىلدارى ءباسپاسوز جانە بۇقارالىق اقپارات ءمينيسترى، كەيىن پرەمەر-ءمينيستردىڭ ورىنباسارى، قازاقستاننىڭ قىتاي، سولتۇستىك كورەيا، ۆەتنام جانە موڭعولياداعى ەلشىسى قىزمەتتەرىن اتقاردى. ءماجىلىس جانە سەنات دەپۋتاتى بولدى.
