بىشكەك قالاسىنداعى №33 مەكتەپ-گيمنازياعا قازاقستان پرەزيدەنتى قاسىم-جومارت توقاەۆتىڭ اكەسى – كەمەل توقاەۆتىڭ ەسىمى بەرىلدى، دەپ حابارلايدى "ادىرنا" ۇلتتىق پورتالى.
بۇل تۋرالى قىرعىزستان پرەزيدەنتى سادىر جاپاروۆتىڭ ءباسپاسوز حاتشىسى اسحات الاگوزوۆ حابارلادى.
ونىڭ ايتۋىنشا، قازاق جازۋشىسى، قازاق پروزاسىنداعى دەتەكتيۆ جانرىنىڭ نەگىزىن قالاۋشى كەمەل توقاەۆتىڭ ەسىمىن مەكتەپكە بەرۋ باستاماسىن سادىر جاپاروۆ كوتەرگەن.
الاگوزوۆتىڭ مالىمەتىنشە، سادىر جاپاروۆ رەسەيگە جۇمىس ساپارى كەزىندە بۇل جاڭالىقتى قازاقستان پرەزيدەنتى قاسىم-جومارت توقاەۆپەن بولىسكەن.
سوعىس جىلدارى №33 مەكتەپ فرۋنزە جاياۋ اسكەر اسكەري ۋچيليششەسى بولعان. قازاقستان پرەزيدەنتىنىڭ اكەسى ءدال وسى وقۋ ورنىن ءتامامداپ، مايدانعا اتتانعان.
بۇعان دەيىن قازاقستان پرەزيدەنتى №33 مەكتەپكە وقۋشىلارعا ارنالعان اۆتوبۋس تارتۋ ەتكەن بولاتىن.
ەسكە سالا كەتەيىك، 9 مامىر كۇنى رەسەي پرەزيدەنتى ۆلاديمير پۋتين قازاقستان پرەزيدەنتى قاسىم-جومارت توقاەۆقا اكەسى كەمەل توقاەۆتى ماراپاتتاۋ پاراعىن تابىس ەتكەن بولاتىن.
