اقمولا وبلىسىندا 45 مىڭ «جەڭىس لەنتاسى» تاراتىلدى: مەرەكەنىڭ لەبى سەزىلە باستادى

7 مامىردان باستاپ اقمولا وبلىسىنىڭ بارلىق قالالارى مەن اۋداندارىندا ۇلى جەڭىستىڭ 80 جىلدىعىنا ارنالعان ەرەكشە پاتريوتتىق اكتسيا باستاۋ الدى. بيىلعى جىلى وبلىس كولەمىندە 45 مىڭ دانا «جەڭىس لەنتاسى» تاراتىلدى. مەرەكەنىڭ جاقىنداعانى كوشەلەردەگى كوڭىل كۇيدەن-اق سەزىلەدى. اسپان تۇستەس كوگىلدىر جانە ورتاسىندا التىن ءتۇستى ۇلتتىق ورنەكپەن بەزەندىرىلگەن جەڭىس لەنتاسى – ەلىنىڭ بەيبىتشىلىگى مەن اتا-بابالار ەرلىگىنىڭ جارقىن نىشانىنا اينالدى. لەنتالار قالا تۇرعىندارىنا، جاستارعا، قوناقتارعا، مەكەمە قىزمەتكەرلەرىنە تاراتىلىپ، ءار ادامنىڭ كەۋدەسىندە وتكەنگە دەگەن قۇرمەت پەن ماقتانىشتىڭ بەلگىسىندەي جارقىراپ تۇر. بۇل تەك لەنتا عانا ەمەس – بۇل جۇرەكتەگى جەڭىسكە دەگەن العىس پەن تاعزىم. اكتسيانى ۇيىمداستىرۋشىلاردىڭ ايتۋىنشا، مۇنداي باستامالار ۇرپاقتار ساباقتاستىعىن نىعايتىپ، وتانعا دەگەن سۇيىسپەنشىلىكتى ارتتىرادى. «جەڭىس لەنتاسى» – بەيبىت ءومىر ءۇشىن جانىن قيعان باتىرلاردى ەسكە الۋدىڭ، ولاردىڭ رۋحىنا تاعزىم ەتۋدىڭ كورىنىسى. كوكشەتاۋدىڭ الاڭدارىندا، كوشەلەرىندە، وقۋ ورىندارى مەن مەكەمەلەرىندە لەنتالار سالتاناتتى تۇردە ۇلەستىرىلدى. جاستار ەرەكشە ىقىلاسپەن قابىلداپ، لەنتانى كەۋدەلەرىنە تاعىپ، مايدانگەر اتا-اجەلەرىنىڭ رۋحىنا قۇرمەت ءبىلدىردى. ۇلى جەڭىس كۇنى جاقىنداپ كەلەدى. وسىنداي سيمۆوليكالىق اكتسيالار ەلدىڭ ءار ازاماتىنىڭ جۇرەگىندە سول ءبىر تاريحي كۇننىڭ ماڭىزىن ەسكە سالىپ، ەلدىك پەن بىرلىكتىڭ قادىرىن ارتتىرىپ وتىر.