«اۋىل اماناتى»: اقمولا وبلىسىندا اۋىل تۇرعىندارى ءوز بيزنەسىن اشۋعا مۇمكىندىك الۋدا

اقمولا وبلىسىندا 2023 جىلى باستالعان «اۋىل اماناتى» باعدارلاماسى تابىستى جالعاسۋدا. باعدارلامانىڭ باستى ماقساتى - اۋىل تۇرعىندارىنىڭ ءومىر ءسۇرۋ ساپاسىن جاقسارتۋ مەن تابىسىن ارتتىرۋ. بۇگىندە بۇل باستاما وبلىستىڭ 17 اۋدانى مەن 220-دان استام اۋىلدىق وكرۋگىن قامتىپ، 400 مىڭعا جۋىق تۇرعىنعا سەرپىن بەرىپ وتىر. باعدارلاما اياسىندا اۋىل كاسىپكەرلەرىنە 2,5% جىلدىق مولشەرلەمەمەن، 5-7 جىل مەرزىمگە جەڭىلدەتىلگەن نەسيە الۋ مۇمكىندىگى بەرىلدى. تەك وتكەن جىلدىڭ وزىندە عانا وڭىردە 1,2 ميلليارد تەڭگە كولەمىندە 198 ميكروكرەديت بەرىلدى. بۇل قاراجاتتىڭ ارقاسىندا ونداعان جاڭا كاسىپ اشىلىپ، كەڭەيتىلىپ، 262 جاڭا جۇمىس ورنى قۇرىلدى. نەسيەنىڭ نەگىزگى بولىگى - 930 ميلليون تەڭگە - مال شارۋاشىلىعىن دامىتۋعا باعىتتالدى. ناتيجەسىندە اۋىلداردا 3 مىڭنان استام ءىرى قارا، ۇساق مال، جىلقى جانە قۇس ساتىپ الىندى. بۇل تەك مال باسىنىڭ وسۋىنە ەمەس، اۋىل شارۋاشىلىعىنىڭ وركەندەۋىنە دە ىقپال ەتتى. سونىمەن قاتار، ميكروكرەديتتەر شاعىن بيزنەسكە دە سەرپىن بەردى: اتباسار اۋدانىندا ناۋبايحانا اشىلىپ، بەتون بۇيىمدارىن وندىرۋگە ارنالعان تەحنيكا، جيھاز جاسايتىن قۇرالدار مەن جۇك كولىكتەرى ساتىپ الىندى. كوپتەگەن اۋدانداردا جاڭا تەحنيكالىق قىزمەت كورسەتۋ ستانتسيالارى ىسكە قوسىلدى. باعدارلاما اۋىل شارۋاشىلىق كووپەراتيۆتەرىن دامىتۋعا دا مۇمكىندىك بەردى. مىسالى، بۋلاندى اۋدانىنداعى «كۋنتۋعان قازىناسى» اۋىل شارۋاشىلىق كووپەراتيۆى 17 ساۋىندى سيىر، تراكتور جانە جەم-ءشوپ ساتىپ السا، ەرەيمەنتاۋ اۋدانىنداعى «بەرەكە» كووپەراتيۆى تولدەيتىن ءىرى قارا سانىن ارتتىردى. 2024 جىلى باعدارلاما ودان ءارى كەڭەيە ءتۇستى. بيىل 1,8 ميلليارد تەڭگەگە 308 ميكروكرەديت بەرۋ جانە 326 جاڭا جۇمىس ورنىن اشۋ جوسپارلانعان. 2025 جىلدىڭ قاڭتارىنان باستاپ بەلسەندى جۇمىس باستالىپ، 300 ءوتىنىم قابىلداندى، ونىڭ ىشىندە 108 جوباعا، ياعني 1 ميلليارد تەڭگەگە جۋىق نەسيە ماقۇلداندى. باعدارلاما بۇرىنعىداي مال شارۋاشىلىعىنا باسىمدىق بەرەدى، دەگەنمەن ەندى كوكونىس شارۋاشىلىعى، قۇس ءوسىرۋ، جىلقى شارۋاشىلىعى سىندى باسقا دا باعىتتار قارجىلاندىرىلماق. 2025 جىلى اقمولا وبلىسىندا «اۋىل اماناتى» باعدارلاماسىن جۇزەگە اسىرۋعا 2,5 ميلليارد تەڭگە قاراستىرىلىپ وتىر. جىل سوڭىنا دەيىن 370 ميكروكرەديت بەرىلىپ، 400-دەن استام جۇمىس ورنى اشىلادى دەپ كۇتىلۋدە.