1962 جىلدىڭ 7 شىلدەسىندە 20 جاستاعى ودري باكەبەرگ ريدسبۋرگ قالاسىنداعى ۇيىنەن ءىز-ءتۇزسىز جوعالىپ كەتكەن. جوعالعانىنا 63 جىل وتكەن سوڭ، ونىڭ قازىرگى ۋاقىتتا باسقا شتاتتا ءومىر ءسۇرىپ جاتقانى بەلگىلى بولدى. ۆيسكونسين شتاتىنىڭ پوليتسياسى حابارلاعانداي، ودري ءوز ەركىمەن ۇيىنەن كەتىپ، ەشقانداي قىلمىس نەمەسە زاڭعا قايشى ارەكەتتەردىڭ قۇربانى بولماعان.
وسى جىلدار بويى ونىڭ جوعالۋى تۋرالى ءتۇرلى نۇسقالار قاراستىرىلىپ، تەرگەۋ ناتيجەسىز بولعان. ءىس توقتاپ قالعان سوڭ، شەريف كەڭسەسى ەسكى ىستەردى قايتا قاراپ شىعىپ، ءودريدىڭ اپكەسىنىڭ گەنەالوگيالىق سايتتاعى اككاۋنتىن تاپقان. بۇل ءىستىڭ قايتا جاڭعىرۋىنا سەبەپ بولعان.
شەريفتىڭ ايتۋىنشا، ولار وسى جاڭالىقتان كەيىن ودري باكەبەرگپەن بايلانىس ورناتىپ، 45 مينۋت بويى تەلەفون ارقىلى سويلەسكەن. ودري ءوز شەشىمىنە سەنىمدى ەكەنىن جانە وتكەن ءومىرىن ارتتا قالدىرىپ، جاڭا ءومىر باستاعانىن، تولىقتاي باقىتتى ەكەنىن ايتقان.
ودري 15 جاسىندا تۇرمىسقا شىعىپ، ەكى بالا دۇنيەگە اكەلگەن. الايدا ونىڭ كۇيەۋىمەن قاتىناسى قيىن بولعان. جوعالىپ كەتەر الدىندا ودري كۇيەۋىنە قارسى سوتقا ارىز جازىپ، ونىڭ وعان بىرنەشە رەت قول جۇمساعانىن جانە ولتىرۋمەن قورقىتقانىن مالىمدەگەن. جوعالىپ كەتكەن كۇنى ول ءجۇن وندىرەتىن فابريكاعا جۇمىسقا كەتكەن.
ودري بالالارىنىڭ كۇتۋشىسىمەن بىرگە مەديسون قالاسىنا جەتىپ، ودان ءارى يندياناپوليسكە بارعان.
بۇل ىستە تەرگەۋشىلەر ءار ءتۇرلى نۇسقالاردى تەكسەرىپ، بىراق ءدال ناتيجە بولماعان.
وسىلايشا، 63 جىل بويى ىزدەۋدە بولعان ودري باكەبەرگامان-ەسەن تابىلىپ، جاڭا ءومىرىن باستاۋ ءۇشىن ۆيسكونسيننەن كەتۋ تۋرالى شەشىم قابىلداعانىن مويىندادى.
