اقمولا وبلىسىندا ازىق-تۇلىك قاۋىپسىزدىگى قالاي قامتاماسىز ەتىلۋدە

ازىق-تۇلىك قاۋىپسىزدىگىن قامتاماسىز ەتۋ – ەلدىڭ تۇراقتى دامۋى مەن ازاماتتاردىڭ ءال-اۋقاتىنىڭ باستى كەپىلى. بۇل باعىتتا اقمولا وبلىسىندا جۇيەلى ءارى ناتيجەلى جۇمىستار جۇرگىزىلۋدە. 2025 جىلدىڭ العاشقى توقسانىندا ءوڭىردىڭ اۋىل شارۋاشىلىعى سالاسى ەلەۋلى ءوسىمدى كورسەتتى: ەت ءوندىرىسى 10 پايىزعا، ءسۇت – 3,7 پايىزعا، ال جۇمىرتقا – 0,4 پايىزعا ارتتى. مۇنداي جەتىستىككە مەملەكەتتىك قولداۋدىڭ كۇشەيۋى مەن وڭىردە مال شارۋاشىلىعى فەرمالارى سانىنىڭ ارتۋى اسەر ەتتى. بۇگىندە وبلىستا 426 مىڭنان استام ءىرى قارا، 264 مىڭعا جۋىق جىلقى جانە 10 ميلليونعا جۋىق قۇس تىركەلگەن. وڭدەلگەن ءونىم كولەمى دە ارتىپ كەلەدى. جىل باسىنان بەرى 25 مىڭ توننا ەت، 33 مىڭ توننا ءسۇت وڭدەلىپ، ايران، ماي سەكىلدى ءسۇت ونىمدەرىنىڭ ءوندىرىسى ۇلعايدى. جالپى، ازىق-تۇلىك ونىمدەرىنىڭ ءوندىرىسى 13,7 پايىزعا كوبەيىپ وتىر. اۋىل شارۋاشىلىعىن دامىتۋ ماقساتىندا وڭىردە جالپى قۇنى 46,5 ملرد تەڭگەنى قۇرايتىن 20 ينۆەستيتسيالىق جوبا ىسكە اسىرىلىپ جاتىر. بۇل جوبالار ءسۇت فەرمالارىن، ەت وڭدەۋ زاۋىتتارىن، استىق پەن كوكونىس ساقتايتىن قويمالاردى، سونداي-اق سۋارۋ جۇيەلەرىن سالۋدى قامتيدى. 2025 جىلعى كوكتەمگى ەگىس ناۋقانىنا دايىندىق تا جوعارى دەڭگەيدە جۇرگىزىلۋدە. بيىل وڭىردە اۋىل شارۋاشىلىعى داقىلدارى 5,2 ملن گەكتار القاپقا سەبىلەدى. نەگىزگى باسىمدىق – مايلى داقىلدارعا بەرىلمەك. ولاردىڭ پايداسى ءداندى داقىلدارعا قاراعاندا اناعۇرلىم جوعارى بولعاندىقتان، بيىل ەگىس كولەمى وتكەن جىلمەن سالىستىرعاندا 161 مىڭ گەكتارعا ارتتى. قازىرگى تاڭدا 540 مىڭ توننا تۇقىمنىڭ ءبارى تەكسەرىلىپ، ساپالى دەپ تانىلدى. دايىندىق اياسىندا 37 مىڭنان استام تەحنيكا جوندەلىپ، جۇمىسقا ساقاداي ساي تۇر. مەملەكەتتەن نارىقتاعى باعادان تومەن باعادا 82,9 مىڭ توننا جەڭىلدەتىلگەن ديزەل وتىنى ءبولىندى. وڭىردە ءسۇت ءوندىرىسىن دامىتۋعا باسا نازار اۋدارىلۋدا. وتكەن جىلى 5 زاماناۋي ءسۇت-تاۋار فەرماسى ىسكە قوسىلىپ، 5,4 مىڭ باسقا ارنالعان جاڭا كەشەندەر سالىندى. 2025 جىلى اتباسار، زەرەندى، بۋراباي اۋداندارىندا تاعى 5 فەرما اشۋ جوسپارلانعان. بۇل وبلىس بويىنشا ءسۇت ءوندىرىسىن 70 مىڭ تونناعا دەيىن ارتتىرۋعا مۇمكىندىك بەرەدى. اقمولا وبلىسى ەكسپورت الەۋەتىن دە ارتتىرىپ وتىر. 2024 جىلى وڭىردەن قىتاي، يران، يتاليا، لاتۆيا، وزبەكستان سەكىلدى ەلدەرگە 2,5 ميلليون توننادان استام استىق ەكسپورتتالدى. جاقىندا ەستونياداعى Muuga پورتىمەن ىنتىماقتاستىق تۋرالى مەموراندۋمعا قول قويىلدى. بۇل قادام اقمولا ونىمدەرىن ەۋروپا نارىعىنا شىعارۋدىڭ جاڭا جولدارىن اشادى. سونىمەن بىرگە ەت، ءسۇت ونىمدەرى، ماي، جۇمىرتقا مەن ءتىپتى ءتىرى مال دا شەتەلگە جونەلتىلىپ جاتىر. فەرمەرلەر مەملەكەتتەن جەڭىلدەتىلگەن نەسيەلەر، سۋبسيديالار، تەحنيكا جانە تىڭايتقىشتار الىپ وتىر. مىسالى، تەك مينەرالدى تىڭايتقىشتار ءۇشىن 12 ملرد تەڭگە بولىنسە، اۋىل شارۋاشىلىعىن قارجىلاندىرۋدىڭ جالپى كولەمى 700 ملرد تەڭگەگە جەتتى. الايدا ەندى مەملەكەتتىك قولداۋدى الۋ ءۇشىن شارۋاشىلىقتار ءوندىرىستىڭ ناقتى ءوسىمىن كورسەتۋى ءتيىس. ناتيجە بولمايىنشا، كومەك توقتاتىلۋى مۇمكىن. قازىرگى تاڭدا وبلىستا 67 قايتا وڭدەۋ كاسىپورنى جۇمىس ىستەيدى. ونىڭ ىشىندە 16-سى – ەت، 15-ءى – ءسۇت، 28-ءى – ۇن ونىمدەرىن وڭدەۋمەن اينالىسادى. ءسۇتتى وڭدەۋ دەڭگەيى 87 پايىزعا، ال ەت- 78 پايىزعا جەتتى. بۇل – ازىق-تۇلىك ونىمدەرىنىڭ وڭىردە ءوندىرىلىپ، قايتا وڭدەلۋ ارقىلى وڭىرلىك ەكونوميكانىڭ تۇراقتىلىعىنا ۇلەس قوسىپ وتىرعانىن بىلدىرەدى. اقمولا وبلىسى اۋىل شارۋاشىلىعىن دامىتۋ، ءونىم ءوندىرۋ مەن قايتا وڭدەۋدى كۇشەيتۋ ارقىلى ەلىمىزدىڭ ازىق-تۇلىك قاۋىپسىزدىگىن قامتاماسىز ەتۋگە زور ۇلەس قوسۋدا. مەملەكەتتىك قولداۋ مەن اگرارلىق ساياساتتىڭ ناقتى ناتيجەسى – حالىقتى ساپالى، وتاندىق ازىق-تۇلىكپەن قامتاماسىز ەتۋ جانە شەتەل نارىعىنا شىعۋ مۇمكىندىگىنىڭ ارتۋى.