ءۇندىستان پاكىستانعا جانە پاكىستاندىق بيلىك باقىلاۋىنداعى كاشمير اۋداندارىنا سوققى جاساعانىن مالىمدەدى، دەپ حابارلايدى “ادىرنا” ۇلتتىق پورتالى BBC-گە سىلتەمە جاساپ.
بۇل وقيعا دەليدىڭ پاكىستاندى ءۇندىستان باقىلاۋىنداعى كاشميردە تۋريستەرگە جاسالعان شابۋىلعا قاتىسى بار سودىرلاردى قولدادى دەپ ايىپتاۋىنان ەكى اپتا وتكەن سوڭ ورىن الدى. سول شابۋىل كەزىندە 26 ادام قازا تاپقان بولاتىن. پاكىستان بيلىگى بۇل ايىپتاۋلاردى جوققا شىعاردى.
«ءۇندى قارۋلى كۇشتەرى “سيندۋر” وپەراتسياسىن باستاپ، ۇندىستانعا قارسى لاڭكەستىك شابۋىلدار جوسپارلاپ، ۇيىمداستىرعان پاكىستان جانە دجاممۋ مەن كاشميردەگى لاڭكەستىك ينفراقۇرىلىمدارعا سوققى بەردى»، — دەلىنگەن مالىمدەمەدە.
ءۇندى بيلىگى زىمىران سوققىلارى لاڭكەستەردىڭ توعىز نىسانانىن جويدى دەپ مالىمدەسە، پاكىستان بيلىگى بۇل اقپاراتتى جوققا شىعارىپ وتىر.
Reuters اگەنتتىگى ءۇندى اسكەري توپتارىنداعى اتى-ءجونى كورسەتىلمەگەن دەرەككوزگە سىلتەمە جاساپ، زىمىران سوققىلارى يسلامشىل توپتاردىڭ بازالارىنا باعىتتالعانىن حابارلادى.
ال پاكىستان اسكەرى سوققىلار لاڭكەستەرگە ەمەس، بەيبىت تۇرعىندار تۇراتىن اۋداندارعا جاسالعانىن مالىمدەدى. ولاردىڭ ايتۋىنشا، ءۇندى ۇشاقتارى زىمىرانداردى ءوز اۋە كەڭىستىگىنەن ۇشىرعان.
پاكىستان اسكەرىنىڭ ءباسپاسوز قىزمەتى ءۇندىستاننىڭ سوققىلارى سالدارىنان سەگىز ادامنىڭ قازا تاپقانىن، 35 ادامنىڭ جارالانعانىن جانە ەكى ادامنىڭ ءىز-ءتۇزسىز جوعالعانىن حابارلادى. بۇعان دەيىن پاكىستان اسكەرىنىڭ رەسمي وكىلى احمەد شاريف BBC-گە بەرگەن سۇحباتىندا قازا تاپقانداردىڭ ىشىندە ەكى بالانىڭ بارىن ايتقان. ءشاريفتىڭ ايتۋىنشا، سوققىلاردىڭ ءبىرى مەشىتكە تيگەن.
پاكىستان پرەمەر-ءمينيسترى ميان مۇحامماد شاحباز شاريف ۇندىستانعا جاۋاپ بەرەتىنىن مالىمدەدى.
«دۇشپان پاكىستاننىڭ بەس جەرىنە سوققى جاسادى. پاكىستان تولىققاندى جاۋاپ قايتارۋعا قۇقىلى جانە بۇل جاۋاپ قايتارىلىپ جاتىر»، — دەدى ول.
كەيىن، سارسەنبىگە قاراعان ءتۇنى پاكىستان اسكەرىنىڭ ءباسپاسوز قىزمەتى ءۇندىستان التى نىساناعا ءارتۇرلى قارۋلارمەن 24 بولەك سوققى جاساعانىن ناقتىلادى.
پاكىستان اسكەري وكىلىنىڭ ايتۋىنشا، يسلاماباد قاجەتتى ۋاقىتتا جانە قاجەتتى جەردە جاۋاپ بەرەدى.
«اۋە كۇشتەرىمىزدىڭ بارلىق يسترەبيتەلدەرى اۋەگە كوتەرىلدى. بۇل — ءۇندىستان اۋماعىنان جاسالعان ماسقارا شابۋىل»، — دەدى ول.
ءۇندى تاراپىنىڭ حابارلاۋىنشا، پاكىستان اسكەرى كاشميردەگى شەكارا سىزىعىندا ارتيللەريالىق اتىس باستاعان.
كەيىنىرەك پاكىستان اسكەرىنىڭ ءباسپاسوز حاتشىسى پاكىستان ءۇندىستاننىڭ بەس اسكەري ۇشاعىن اتىپ تۇسىرگەنىن مالىمدەدى. ونىڭ ىشىندە ءۇش Rafale فرانتسۋز جويعىشى جانە ەكى كەڭەستىك-رەسەيلىك سۋ-30مكي مەن ميگ-29 ۇشاقتارى بار. بۇل اقپاراتقا قاتىستى ءۇندىستان تاراپى ەشقانداي پىكىر بىلدىرمەدى.
سونىمەن قاتار، پاكىستان اسكەرى ءۇندىستاننىڭ ءبىر بريگاداسىنىڭ شتابىن جويعانىن حابارلادى.
قاۋىپسىزدىك ماقساتىندا ءۇندىستان شەكارا ماڭىنداعى بارلىق وقۋ ورىندارىن جاپتى. پاكىستان دا يسلاماباد پەن شەكاراعا جاقىن باسقا وڭىرلەردە مەكتەپتەردى جاپقان.
