اقمولا وبلىسىندا ءبىر جىل ىشىندە 1 مىڭنان استام ادامعا پسيحولوگيالىق كومەك كورسەتىلدى

اقمولا وبلىسى ءبىلىم باسقارماسىنىڭ جانىنداعى پسيحولوگيالىق قولداۋ ورتالىعىنىڭ قۇرىلعانىنا ءبىر جىل تولدى. قىسقا ۋاقىت ىشىندە ورتالىق ايماقتىڭ ءبىلىم بەرۋ جۇيەسىندە ماڭىزدى قولداۋ نۇكتەسىنە اينالىپ، مىڭنان استام ازاماتقا كاسىبي پسيحولوگيالىق كومەك كورسەتتى. بۇل تۋرالى اقمولا وبلىسىنىڭ ءبىلىم باسقارماسى «پسيحولوگيالىق قولداۋ ورتالىعى» كمم باسشىسى سايران شوكىموۆا بريفينگتە ءمالىم ەتتى، دەپ حابارلايدى وڭىرلىك كوممۋنيكاتسيالار قىزمەتىنەن. ءبىر جىل بۇرىن قۇرىلعان ورتالىقتا 9 پەداگوگ-پسيحولوگ، 2 الەۋمەتتىك پەداگوگ، 8 ادىسكەر، 1 زاڭگەر جانە باسقا ماماندار جۇمىس ىستەيدى. «ءبىزدىڭ ورتالىق جەتى نەگىزگى باعىتتا جۇمىس اتقارادى. كونسۋلتاتسيالىق-دامىتۋشىلىق، عىلىمي-ادىستەمەلىك، جەدەل ارەكەت ەتۋ، كاسىبي قۇزىرەتتىلىكتى ارتتىرۋ، ۇيىمداستىرۋشىلىق، ۆەدومستۆوارالىق ءوزارا ءىس-قيمىل جانە حالىقارالىق ىنتىماقتاستىق»، — دەدى سپيكەر. جىل ىشىندە ورتالىققا تۇسكەن وتىنىشتەردىڭ سانى 1000-نان اسقان. ونىڭ 600-دەن استامى بەتپە-بەت، 500-گە جۋىعى ونلاين-كونسۋلتاتسيالار. قىزمەت الۋشىلاردىڭ باسىم بولىگى – 18 جاسقا دەيىنگى بالالار مەن جاسوسپىرىمدەر (717 ادام). پسيحولوگيالىق كومەككە جۇگىنگەندەردىڭ ىشىندە ايەلدەردىڭ ۇلەسى – 900-گە جۋىق، ەر ازاماتتار – 200-دەن استام. «پسيحولوگيالىق قولداۋ ورتالىعىنىڭ باستى ماقساتى ءبىلىم الۋشىلار، پەداگوگتار مەن اتا-انالاردىڭ پسيحولوگيالىق ءال-اۋقاتىن ساقتاۋ جانە نىعايتۋ. ءبىز ءبىلىم بەرۋ جۇيەسىندەگى وزەكتى ماسەلەلەرگە شۇعىل جاۋاپ بەرەتىن كاسىبي الاڭ قۇرا الدىق»، — دەدى سايران شوكىموۆا. سپيكەردىڭ ايتۋىنشا، سەنىم تەلەفونىنا تۇسكەن قوڭىراۋلاردىڭ باسىم بولىگى تۇلعاارالىق قاتىناستارعا جانە وتباسىلىق تۇسىنبەۋشىلىكتەرگە قاتىستى. ورتالىق ماماندارى كامەلەت جاسقا تولماعاندار اراسىنداعى سۋيتسيد، زورلىق-زومبىلىق ماسەلەلەرىنە ەرەكشە نازار اۋدارىپ وتىر. قازىرگى تاڭدا 11 جاعداي وبلىستىق پسيحيكالىق دەنساۋلىق ورتالىعىنا جولدانسا، 50-دەن استام بالا جەكە كونسۋلتاتيۆتىك كومەك الۋدا. سونىمەن قاتار، «111 بايلانىس ورتالىعى» ارقىلى وبلىستان تۇسكەن 20-دان استام ءوتىنىش تە ورتالىق ماماندارىنىڭ قاراۋىندا. اتا-انالارمەن جۇمىس ماقساتىندا «وتباسى بولۋ ونەرى» جانە «قارىم-قاتىناس قۋانىشى» اتتى 14 ديالوگ الاڭى ۇيىمداستىرىلىپ، Instagram جەلىسىندە 2000-نان استام كورەرمەندى قامتىعان 30 تىكەلەي ەفير وتكىزىلگەن. حالىقارالىق ىنتىماقتاستىق اياسىندا پسيحولوگيالىق قولداۋ ورتالىعى بەلارۋستىڭ ماكسيم تانك اتىنداعى پەداگوگيكالىق ۋنيۆەرسيتەتىمەن، سونداي-اق كوكشەتاۋ ۋنيۆەرسيتەتى جانە «شانس» ورتالىعىمەن مەموراندۋمدارعا قول قويىپ، بىرلەسكەن جوبالار جۇرگىزۋدە. باسىم ماسەلەلەر قاتارىندا بىلىكتى كادر تاپشىلىعى، پسيحولوگيالىق قىزمەتكە دەگەن سەنىمسىزدىك جانە كامەلەتكە تولماعاندارمەن جۇمىس بارىسىندا اتا-انالاردان رۇقسات الۋ قيىندىقتارى اتاپ ءوتىلدى. «ءبىزدىڭ باستى ماقساتىمىز ءار بالانىڭ قاۋىپسىزدىگىن قامتاماسىز ەتۋ جانە پسيحولوگيالىق كومەككە دەر كەزىندە جول اشۋ. بۇل كۇندەلىكتى ۇزدىكسىز جۇمىستى تالاپ ەتەدى»، — دەپ تۇيىندەدى سپيكەر.