بۋرابايدىڭ جاڭا كەلبەتى: شۋچە–بۋراباي ايماعى ءتۋريزمنىڭ تۇراقتى ءوسىم ايماعىنا اينالۋدا

شۋچە–بۋراباي كۋرورتتىق ايماعى ەلىمىزدىڭ عانا ەمەس، بۇكىل اقمولا ءوڭىرىنىڭ باستى تۋريستىك ورتالىعى رەتىندە ءوزىنىڭ پوزيتسياسىن نىعايتىپ كەلەدى. وتكەن جىلى بۇل ايماققا كەلگەن تۋريستەر سانى 1 ميلليون ادامعا دەيىن ءوسىپ، كورسەتىلەتىن قىزمەت كولەمى 30 پايىزعا ارتىپ، 21,5 ميلليارد تەڭگەگە جەتتى. بۇل ناتيجەلەردىڭ نەگىزگى ۇلەسىن ءداستۇرلى تۇردە بۋراباي كۋرورتى قامتاماسىز ەتۋدە. ايماقتاعى ءتۋريزمنىڭ قارقىندى دامۋىنا ينۆەستيتسيالىق بەلسەندىلىك تە ۇلكەن سەرپىن بەرىپ وتىر. سوڭعى جىلدارى بۇل سالاعا قۇيىلعان ينۆەستيتسيا كولەمى 29,5 ميلليارد تەڭگەگە جەتتى. بۇل رەكوردتىق كورسەتكىشتەردىڭ ءبىرى. تۋريزمگە دەگەن قىزىعۋشىلىقتىڭ ارتۋىنا بايلانىستى ۇكىمەت 2025–2029 جىلدارعا ارنالعان شۋچە–بۋراباي ايماعىن دامىتۋدىڭ كەشەندى جوسپارىن بەكىتتى. قۇجات 118 ءىس-شارانى قامتىپ، 137 ميلليارد تەڭگەدەن استام ينۆەستيتسيا تارتۋدى كوزدەيدى. جوسپاردىڭ نەگىزگى باعىتى  جاڭا تۋريستىك لوكاتسيالاردى دامىتۋ. سونىڭ ىشىندە اقبۋرا كۋرورتى، قاتاركول جانە جۇكەي كولدەرىندەگى دەمالىس ايماقتارى بار. بۇل نىساندار بۋرابايعا تۇسەتىن جۇكتەمەنى ازايتىپ، بۇكىل ءوڭىردىڭ تۋريزم الەۋەتىن كەڭەيتپەك. قازىردىڭ وزىندە ايماقتا اۋقىمدى ينفراقۇرىلىم جاڭعىرتۋ جۇمىستارى ءجۇرىپ جاتىر. 2025 جىلى شۋچە قالاسىندا ونداعان شاقىرىم ينجەنەرلىك جەلىلەر مەن جولدار سالىنادى. بۇعان قوسا، كوپ جىلداردان بەرى العاش رەت دەندرولوگيالىق ساياباقتى جاڭعىرتۋ باستالدى. بۇل ەرەكشە تابيعي نىسان تولىق اباتتاندىرىلعان سوڭ، ءوڭىردىڭ جاڭا جاسىل نىسانىنا اينالماق. سونىمەن قاتار، ساكرالدى نىساندارعا باراتىن تۋريستىك باعىتتار ازىرلەنۋدە، جاعاجايلار، سكۆەرلەر، باقىلاۋ الاڭدارى سالىنۋدا. مۇنىڭ ءبارى جاڭا تۋريستىك فورماتتارعا نەگىز قالايدى. ينفراقۇرىلىممەن قاتار، ورنالاستىرۋ ورىندارىنىڭ سانى دا ارتىپ كەلەدى. 2025 جىلى شۋچە كولىنىڭ جاعاسىندا بۋتيك وتەل، شۋچە قالاسىندا كەڭەيتىلگەن دەمالىس ايماعى، جاڭارتىلعان Altay Resort قوناق ءۇيى جانە قاتاركول كولىنىڭ ماڭىندا جاڭا كوتتەدجدەر پايدالانۋعا بەرىلەدى. بۇل جوبالارعا سالىنعان ينۆەستيتسيا كولەمى شامامەن 3 ميلليارد تەڭگە. سونىمەن قاتار، حالىقارالىق Hilton جانە Wyndham برەندتەرىمەن ءىرى جوبالار جۇزەگە اسىرىلۋدا. مىسالى، اكۆاپاركى مەن ۆيللالارى بار Dolce by Wyndham كەشەنىنىڭ قۇنى 11,8 ميلليارد تەڭگە. تسيفرلاندىرۋ مەن قاۋىپسىزدىك ماسەلەسىنە دە ايرىقشا نازار اۋدارىلعان. بيىل كۋرورتتىق ايماقتا 79 اقىلدى بەينەباقىلاۋ كامەراسى ورناتىلادى، ال جاز مەزگىلىندە تىكۇشاق ەكسكۋرسيالارى ىسكە قوسىلادى. كولىك لوگيستيكاسى دا دامىپ كەلەدى. اۋە رەيستەرى سۋبسيديالانادى، تەمىرجول ۆوكزالى جاڭعىرتىلىپ، كىرمە جولدار سالىنۋدا. بۇدان بولەك، ايماقتا سەگىز ەلەكتروموبيلگە ارنالعان قۋاتتاۋ ستانتسياسىن ورناتۋ كوزدەلىپ وتىر. بۇل ەكوتۋريزمگە بەتبۇرىستىڭ ءبىر كورىنىسى. ەكولوگيالىق ماسەلەلەر دە نازاردان تىس قالماعان. بۋراباي اۋدانىندا بيىل قوقىس سۇرىپتاۋ كەشەنىنىڭ قۇرىلىسى باستالادى. بۇل تەك قالدىقتاردى ءبولىپ جيناۋعا عانا ەمەس، قايتا وڭدەۋ مەن جاسىل كاسىپكەرلىكتى دامىتۋعا جول اشادى. جاڭا تۋريستىك نىساندار، اۋقىمدى ينۆەستيتسيالار، زاماناۋي ينفراقۇرىلىم جانە كاسىپكەرلىكتى قولداۋ مۇنىڭ ءبارى شۋچە–بۋراباي ايماعىن ەلىمىزدەگى تۇراقتى ءتۋريزمنىڭ تارتىمدى ورتالىعىنا اينالدىرىپ وتىر. بۋراباي جاي عانا دەمالىس ورنى ەمەس، بۇل دامۋدىڭ، جاڭا يدەيالار مەن ۇزاق مەرزىمدى تابىستىڭ ايماعى.