قوسشىدا گازداندىرۋ جۇمىسى  قارقىندى ءجۇرىپ جاتىر

استانانىڭ ىرگەسىندەگى قوسشى قالاسىندا ينفراقۇرىلىم سالاسىنداعى ءىرى جوبالاردىڭ ءبىرى – گازداندىرۋ جۇمىستارى بەلسەندى جۇرگىزىلۋدە. 2026 جىلعا دەيىن قالا تولىق گاز جۇيەسىنە قوسىلۋى ءتيىس. بۇل مىڭداعان تۇرعىنعا ەكولوگيالىق تازا ءارى قولايلى جىلۋ كوزىنە كوشۋگە مۇمكىندىك بەرەدى. گازداندىرۋ قوسشى قالاسىنىڭ باس جوسپارىنا سايكەس جۇزەگە اسىرىلۋدا. جوبانىڭ جالپى قۇنى 11,3 ميلليارد تەڭگە. مەردىگەر كومپانيا - «اليا-سەرۆيس» جشس. ەنەرگەتيكا باسقارماسىنىڭ مالىمەتىنە سايكەس، جوبا اياسىندا 408 شاقىرىم گاز قۇبىرى تارتىلىپ، 112 مىڭنان استام ادام نەمەسە 31 مىڭنان اسا ابونەنت قامتىلادى. 2024 جىلدىڭ ىشىندە 70 شاقىرىمعا جۋىق قۇبىر توسەلدى. ونىڭ ىشىندە 2 شاقىرىم جوعارى قىسىمدى، 15 شاقىرىم ورتاشا جانە 53 شاقىرىم تومەن قىسىمدى قۇبىرلار. جىل سوڭىنا دەيىن العاشقى 8,4 مىڭ ابونەنتكە گاز بەرىلەدى. بۇل شامامەن 30 مىڭ تۇرعىندى قامتيدى. جوبانى قارجىلاندىرۋعا «سامۇرىق-قازىنا» اكتسيونەرلىك قوعامى قولداۋ كورسەتىپ وتىر. قازىردىڭ وزىندە 4 ميلليارد تەڭگە بولىنگەن، الداعى ۋاقىتتا تاعى 5,4 ميلليارد تەڭگە بولىنەدى دەپ جوسپارلانىپ وتىر. مامانداردىڭ ايتۋىنشا، گازداندىرۋ تەك تۇرمىستىق قولايلىقتى ارتتىرىپ قويماي، ەكولوگيالىق جاعدايدى جاقسارتىپ، ەنەرگيا تيىمدىلىگىن كوتەرۋگە مۇمكىندىك بەرەدى. سونىمەن قاتار بۇل جوبا قوسشى قالاسىنىڭ ينۆەستيتسيالىق تارتىمدىلىعىن ارتتىرىپ، تۇراقتى دامۋ باعىتىنا سەرپىن بەرمەك. گازبەن قامتۋ - قالا تۇرعىندارىنىڭ ءومىر ساپاسىن جاڭا دەڭگەيگە كوتەرەتىن ماڭىزدى قادام.