3 مامىر كۇنى جامبىل وبلىسىنىڭ تاۋلى ايماعىندا وتكەن «قىزعالداق مۇرا» اتتى حالىقارالىق فەستيۆالگە مىڭداعان قوناق جينالىپ، كولىك تاپشىلىعى تۋىنداعان. بۇل جاعدايعا قاتىستى اكىمدىك پىكر ءبىلدىردى، دەپ حابارلايدى "ادىرنا" ۇلتتىق پورتالى.
بيلىك وكىلدەرىنىڭ الەۋمەتتىك جەلىلەردەگى جارقىن شارا تۋرالى ەسەپتەرىن تۇرعىندار سىنعا الدى. لوكاتسيانىڭ الىس ورنالاسۋى مەن كولىك تاپشىلىعى سالدارىنان كوپتەگەن ادام بىرنەشە شاقىرىم جاياۋ جۇرۋگە ءماجبۇر بولعان، ال كەيبىرى مۇلدە جەتپەي قالعان.
بۇگىن بۇل جاعدايعا جامبىل وبلىسى اكىمدىگىنىڭ كاسىپكەرلىك جانە ءتۋريزمدى دامىتۋ باسقارماسىنىڭ باسشىسى اسپانديار سەيسەباەۆ پىكىر ءبىلدىردى.
«فەستيۆال سايتى ارقىلى 3232 ادام تىركەلدى، تاعى 2000 ادام تىركەلۋسىز كەلدى. قاتىسۋشىلاردىڭ جالپى سانى 5000-نان استى. شامامەن 4000 ادام جەكە كولىكتەرىمەن كەلگەن. 700-دەن استام جەكە كولىك، سونىڭ ىشىندە سپرينتەرلەر بولدى. جولاۋشىلاردى تاسىمالداۋداعى باستى ماسەلە – تاۋلى ايماقتاعى كۇردەلى جول جاعدايى مەن بىرجاقتى قوزعالىس بولدى. سونىمەن قاتار، جەكە كولىكتەرىمەن كەلگەن ادامدار جولدا كەدەرگى جاساپ، قوزعالىستى قيىنداتتى»، – دەدى ول.
ونىڭ ايتۋىنشا، تاراز قالاسىنان ارنايى دايىندالعان 20 اۆتوبۋسپەن 918 ادام جەتكىزىلگەن. تىركەلگەن قوناقتارعا ارنالعان 40 «نيۆا» اۆتوكولىگى مەن 10 پاز اۆتوبۋسى دايىندالعان.
«جەكە كولىكتەرىمەن كەلگەن كەي ازاماتتار كولىكتەرىن تومەنگى جول بويىنا تاستاپ، تارازدان كەلگەن قوناقتارعا ارنالعان كولىككە ءمىنىپ العان. بۇل جولاۋشىلار سانىن كوبەيتىپ، قوسىمشا تاسىمالداۋعا كەدەرگى كەلتىردى. ادامدار فەستيۆال اياقتالماي جاتىپ كەتە باستادى. 14:00 مەن 15:00 ارالىعىندا قاتىسۋشىلار لەگى كۇرت ارتتى. قوناقتاردى تاۋلى پلاتودان تاسىمالداۋ بويىنشا شارالار قابىلداندى. سوڭعى قوناقتار 17:20-دا جونەلتىلدى. ءبارى شتاتتىق رەجيمدە ءوتتى، زارداپ شەككەندەر جوق»، – دەدى باسقارما باسشىسى.
اسپانديار سەيسەباەۆ مۇنداي اۋقىمدى شارا وڭىردە العاش رەت ۇيىمداستىرىلعانىن جانە بۇل جاعداي بولاشاقتا ەسكەرىلەتىن تاجىريبە بولاتىنىن اتاپ ءوتتى. سونداي-اق، فەستيۆالگە قاتىسقان شەتەلدىك قوناقتار مەن عالىمدار تاراپىنان وڭ پىكىرلەر ايتىلعانىن، بۇل جامبىل وبلىسىندا ءتۋريزمدى دامىتۋ ءۇشىن تاعى ءبىر تارتىمدى ورىن پايدا بولعانىن كورسەتەتىنىن جەتكىزدى.
