ۇلتتىق قاۋىپسىزدىك كوميتەتىنىڭ بۇرىنعى توراعاسى كارىم ءماسىموۆ مەملەكەت قارجىسىن جەكە قاجەتىنە پايدالانعان بولۋى مۇمكىن. بۇل تۋرالى بريتاندىق The Telegraph باسىلىمى Freedom for Eurasia ۇيىمىنىڭ جاڭا زەرتتەۋىنە سىلتەمە جاساپ مالىمدەدى، دەپ حابارلايدى "ادىرنا" ۇلتتىق پورتالى.
زەرتتەۋ 2014 جىلى ينتەرنەتكە تاراعان قازاقستان شەنەۋنىكتەرىنىڭ حات الماسۋىنا نەگىزدەلگەن. ۇيىم دەرەگىنشە، ءماسىموۆ 20 ميلليون دوللارعا دەيىنگى قارجىنى ءسان-سالتاناتتى ءومىر سالتىنا جۇمساعان. اتاپ ايتقاندا پاريجدەگى ديسنەيلەندكە ساياحات، Ritz قوناقۇيىندە تۇرۋ، بىرنەشە Mercedes-Benz اۆتوكولىگىن جانە شەتەلدەگى جىلجىمايتىن مۇلىكتى ساتىپ الۋ، سونداي-اق ناپولەون بوناپارتتىڭ قولىمەن جازىلعان حاتتاردى يەلەنۋ.
سونداي-اق ول رەسەيلىك استرولوگقا 202 مىڭ دوللار تولەگەنى ايتىلعان. بۇل استرولوگ كەزىندە حيللاري كلينتون اقش پرەزيدەنتى بولىپ سايلانادى جانە 2018 جىلعا قاراي ماسكەۋ رەسەيدىڭ استاناسى بولمايدى دەپ بولجاعان. الايدا بۇل بولجامدار ورىندالماعان.
Freedom for Eurasia زەرتتەۋشىلەرىنىڭ پىكىرىنشە، كارىم ءماسىموۆ تەك مەملەكەتتىك قارجىنى ىسىراپ ەتۋمەن شەكتەلمەي، ەلدەگى كلەپتوكراتيالىق جۇيەنىڭ قالىپتاسۋىنا جانە نىعايۋىنا ۇلەس قوسقان.
«بارلىق دەرەكتەر ءماسىموۆتىڭ مەملەكەت ەسەبىنەن بايىپ قانا قويماي، سونىمەن قاتار كلەپتوكراتيالىق جۇيەنى قۇرۋ مەن قولداۋدا شەشۋشى ءرول اتقارعانىن كورسەتەدى»، — دەلىنگەن ەسەپتە.
ۇيىمنىڭ مالىمدەۋىنشە، حاتتاردىڭ تۇپنۇسقالىعى قازاقستان بيلىگىنىڭ ولارعا رەاكتسياسىمەن راستالادى. سەبەبى اتالعان دەرەكتەردىڭ جاريا بولماۋىنا بيلىك تاراپىنان ەلەۋلى توسقاۋىلدار قويىلعان.
