اقمولا وبلىسىندا كوكتەمگى ەگىس ناۋقانىنا كەشەندى دايىندىق جالعاسۋدا

اقمولا وبلىسىندا كوكتەمگى ەگىس ناۋقانىنا دايىندىق قىزۋ ءجۇرىپ جاتىر. بيىل ءوڭىر ديقاندارى 5,4 ميلليون گەكتار جەرگە جازدىق داقىلدار ەگۋدى جوسپارلاپ وتىر بۇل وتكەن جىلمەن سالىستىرعاندا 52 مىڭ گەكتارعا ارتىق. اۋىل شارۋاشىلىعى القاپتارىن ارتاراپتاندىرۋعا باسىمدىق بەرىلۋدە: مايلى داقىلدار كولەمى 430 مىڭ گەكتارعا دەيىن ۇلعايسا، كوكونىس، كارتوپ جانە مال ازىعى داقىلدارى دا كوبەيەدى. كۇنتىزبە بويىنشا مامىر باستالدى بۇل ەگىننىڭ بولاشاعى شەشىلەتىن جاۋاپتى كەزەڭ. قازىرگى تاڭدا نەگىزگى مىندەتتەردىڭ ءبىرى توپىراقتا قىستان جينالعان ىلعالدى ساقتاۋ. قازىردىڭ وزىندە 128,9 مىڭ گەكتار جەردە ىلعال جابۋ جۇمىستارى اياقتالدى، بۇل جوسپاردىڭ 4,4 پايىزىن قۇرايدى. ال 3,2 مىڭ گەكتاردا سەبۋ الدىنداعى وڭدەۋ جۇمىستارى جۇرگىزىلدى. «جىرتىلعان جەردەگى ىلعال كۇن مەن جەلدىڭ اسەرىنەن تەز جوعالادى. قاۋىپتى ەگىنشىلىك ايماعىندا ىلعالدى ساقتاۋ وتە وزەكتى ماسەلە. جاۋىن-شاشىن مولشەرى بولجاۋعا كەلمەيدى، ال جاز ىستىق بولادى. كوكتەمدە توپىراققا جينالعان ىلعال وسىمدىكتەر ءۇشىن قاۋىپسىزدىك جاستىعى ىسپەتتى. ول ءداننىڭ العاشقى وسۋىنە كومەكتەسەدى. سوندىقتان ديقاندار ساپالى ءارى ۋاقتىلى ىلعال جابۋدىڭ ماڭىزىن جاقسى بىلەدى بۇل ماۋسىم ايىندا ءبىر ۋايىمعا كەم بولاتىنىن بىلدىرەدى»، دەدى اقمولا وبلىستىق اۋىل شارۋاشىلىعى جانە جەر قاتىناستارى باسقارماسىنىڭ ەگىنشىلىك جانە استىق نارىعىن رەتتەۋ ءبولىمىنىڭ باسشىسى مارات ساۋتوۆ. وڭىردە 540,2 مىڭ توننا تۇقىم دايىندالعان، ولاردىڭ بارلىعى كونديتسيالىق دەپ تانىلعان. ونىڭ ىشىندە ءبىرىنشى جانە ەكىنشى كلاستى تۇقىمدار ۇلەسى 78,2 پايىز. «ءبىرىنشى جانە ەكىنشى كلاستى تۇقىمداردى “ۇزدىكتەر” دەۋگە بولادى. ولار تازالىعى، ونگىشتىگى مەن ءوسۋ قۋاتى بويىنشا جوعارى ستاندارتتارعا ساي كەلەدى. ءبىرىنشى كلاسس بارلىق كورسەتكىشتەر بويىنشا ءمىنسىز تۇقىمدار. ولاردىڭ ونگىشتىگى 95 پايىزدان جوعارى، زياندى قوسپالار مەن اۋرۋلار جوقتىڭ قاسى. بۇل ەڭ ساپالى ەگىستىك ماتەريال. ال ەكىنشى كلاسس ازداعان اۋىتقۋى بار، بىراق اگروتەحنيكالىق تالاپتارعا تولىق سايكەس تۇقىم. مۇنداي تۇقىمدار بىركەلكى ءارى مىقتى وسكىن بەرەدى، بۇل بولاشاق ءونىمنىڭ نەگىزى»، – دەپ اتاپ ءوتتى مارات ساۋتوۆ. ونىمدىلىكتى ارتتىرۋ ماقساتىندا ديقاندار 336 مىڭ تونناعا دەيىن تىڭايتقىش ەنگىزۋدى جوسپارلاپ وتىر. ونىڭ العاشقى پارتياسى 90,5 مىڭ توننا بويىنشا كەلىسىمشارتتار جاسالىپ، كولەمنىڭ ۇشتەن ءبىرى جەتكىزىلدى. وسىمدىكتەردى زيانكەستەر مەن اۋرۋلاردان قورعاۋ ءۇشىن وبلىستىق بيۋدجەتتەن پەستيتسيدتەر مەن بيولوگيالىق اگەنتتەردى سۋبسيديالاۋعا 9,4 ميلليارد تەڭگە ءبولىندى. بيىل ءوڭىردىڭ اگروونەركاسىپتىك كەشەنىن قولداۋعا 200 ميلليارد تەڭگەدەن استام قاراجات قاراستىرىلعان: ونىڭ ىشىندە 63,3 ميللياردى سۋبسيدياعا، شامامەن 140 ميللياردى جەڭىلدەتىلگەن نەسيە مەن فورۆاردتىق ساتىپ الۋعا باعىتتالعان. «كەڭ دالا» جانە «كەڭ دالا 2» باعدارلامالارى جەلتوقسان ايىنان باستاپ جۇمىس ىستەپ تۇر، بۇگىندە اگراريلەر 71,5 ميلليارد تەڭگە كولەمىندە جەڭىلدەتىلگەن نەسيە الدى. تەحنيكالىق جابدىقتاۋ دا ماڭىزدى ءرول اتقارادى. ەگىس جۇمىستارىنا 31 مىڭنان استام تەحنيكا تارتىلعان، ونىڭ ىشىندە 12,6 مىڭ تراكتور، 16,9 مىڭ سەيالكا جانە 1,5 مىڭ زاماناۋي ەگىس كەشەنى بار. جىل باسىنان بەرى 5,6 ميلليارد تەڭگەگە 162 تەحنيكا بىرلىگى ساتىپ الىندى. كوكتەمگى دالا جۇمىستارى ءۇشىن وڭىرگە 76,6 مىڭ توننا ارزانداتىلعان ديزەل وتىنى ءبولىندى. وتكەن جىلدان قالعان قالدىقتى ەسەپتەگەندە جالپى كولەم 82,9 مىڭ توننا. شارۋا قوجالىقتارى ءۇشىن ءبىر ليتر ديزەلدىڭ تۇپكىلىكتى باعاسى 254 تەڭگە. بۇگىندە 50 مىڭ تونناعا جۋىق وتىن بويىنشا كەلىسىمشارت جاسالىپ، نەگىزگى بولىگى تولەنىپ، شارۋالارعا جەتكىزىلدى. كوكتەم قىزىپ تۇر، ال ديقانداردا بوس ۋاقىت جوق. ەگىس ناۋقانى قانشالىقتى ۇيلەسىمدى وتسە، ماۋسىمنىڭ ناتيجەسى دە سوعان بايلانىستى بولماق. ال بۇل ناتيجەنىڭ نەگىزى قازىر قالانۋدا.