بۇگىن ءماجىلىس دەپۋتاتتارى سالىق كودەكسىنە وزگەرىستەر ەنگىزۋ تۋرالى زاڭ جوباسىن ەكىنشى وقىلىمدا قابىلدادى، دەپ حابارلايدى "ادىرنا" ۇلتتىق پورتالى.
ءماجىلىس دەپۋتاتى، جۇمىس توبىنىڭ جەتەكشىسى بەرىك بەيسەنعاليەۆتىڭ ايتۋىنشا، سالىق كودەكسىنىڭ جوباسى وتكەن جىلى تامىزدا پارلامەنتكە ۇسىنىلعان باستاپقى نۇسقادان مازمۇندىق جاعىنان وزگەشە.
«ققس رەفورماسى بويىنشا – باستاپقىدا ۇكىمەت ۇسىنعان 20 پايىزدىق مولشەرلەمە 16 پايىزعا دەيىن تومەندەتىلدى. ققس بويىنشا مىندەتتى تىركەۋ شەگى 15 ميلليون تەڭگەدەن 40 ميلليون تەڭگەگە دەيىن كوتەرىلدى. ءدارى-دارمەكتەر مەن مەديتسينالىق قىزمەتتەرگە تومەندەتىلگەن ققس مولشەرلەمەلەرى ەنگىزىلەدى: 2026 جىلدان باستاپ – 5 پايىز، 2027 جىلدان باستاپ – 10 پايىز. كەپىلدەندىرىلگەن تەگىن مەديتسينالىق كومەك، مىندەتتى الەۋمەتتىك مەديتسينالىق ساقتاندىرۋ، سيرەك كەزدەسەتىن جانە الەۋمەتتىك ماڭىزى بار اۋرۋلاردى ەمدەۋ شەڭبەرىندەگى تاۋارلار مەن قىزمەتتەر ققس-تان بوساتىلادى»، – دەدى بەيسەنعاليەۆ ءماجىلىستىڭ جالپى وتىرىسىندا.
ققس-تان الەۋمەتتىك ماڭىزى بار ازىق-تۇلىك تاۋارلارى مەن وتاندىق كىتاپتار، سونداي-اق ولاردى باسىپ شىعارۋ قىزمەتتەرى دە بوساتىلادى. اۋىل شارۋاشىلىعى تاۋار وندىرۋشىلەرىن قولداۋ ماقساتىندا قوسىمشا ەسەپكە الىناتىن ققس كولەمى 70 پايىزدان 80 پايىزعا دەيىن ارتتىرىلدى. بۇل ولاردىڭ سالىق جۇكتەمەسىن ازايتادى.
«رۇقسات بەرۋ جۇيەسىنىڭ ورنىنا تىيىم سالىنعان قىزمەت تۇرلەرىنىڭ ءتىزىمى ەنگىزىلەدى. ايماقتىق ەرەكشەلىكتەردى ەسكەرۋ ماقساتىندا ءماسليحاتتار 4 پايىزدىق بىرىڭعاي مولشەرلەمەنى 50 پايىزعا دەيىن وزگەرتە الادى. بيزنەس اراسىنداعى وپەراتسيالارعا ارنايى سالىق رەجيمىن قولدانۋ كەڭەيتىلەدى»، – دەدى دەپۋتات.
بۇدان بولەك، زاڭ جوباسىندا الەۋمەتتىك سالا ۇيىمدارى ءۇشىن كورپوراتيۆتىك تابىس سالىعىنىڭ تومەندەتىلگەن مولشەرلەمەلەرى بەلگىلەنەدى: 2026 جىلدان باستاپ – 5 پايىز، 2027 جىلدان باستاپ – 10 پايىز. مۇگەدەكتىگى بار ادامدار ءۇشىن الەۋمەتتىك سالىق شەگەرىمى 5000 اەك-كە دەيىن ۇلعايتىلدى (2025 جىلى شامامەن 19,6 ميلليون تەڭگە).
قۇمار ويىن جانە بانك سالاسىنا ارنالعان كتس مولشەرلەمەسى 25 پايىزعا دەيىن كوتەرىلەدى. دەگەنمەن، كاسىپكەرلىك سۋبەكتىلەرىن نەسيەلەۋدەن تۇسەتىن كىرىستەر بويىنشا بانكتەر ءۇشىن ستاۆكا 20 پايىز دەڭگەيىندە ساقتالادى. جالاقى بويىنشا جەكە تابىس سالىعى ءۇشىن پروگرەسسيۆتى شكالا ەنگىزىلەدى: 8500 اەك-كە دەيىنگى جىلدىق تابىسقا – 10 پايىز، ودان اسقان سوماعا – 15 پايىز; ديۆيدەند تۇرىندەگى تابىسقا – 230 000 اەك-كە دەيىن – 5 پايىز، ودان جوعارى بولسا – 15 پايىز.
«الكوگول، تەمەكى، قىزدىرىلاتىن تەمەكى ونىمدەرى مەن ەنەرگەتيكالىق سۋسىندارعا اكتسيزدەردى كەزەڭ-كەزەڭىمەن ارتتىرۋ تۋرالى شەشىم قابىلداندى. بۇل قادام حالىق اراسىندا سالاۋاتتى ءومىر سالتىن ىنتالاندىرۋعا باعىتتالعان»، – دەدى بەيسەنعاليەۆ.
اۋىل شارۋاشىلىعى ماقساتىنداعى جەرلەردى ءتيىمسىز پايدالانعان جاعدايدا تولەم مولشەرلەمەسى 100 ەسە وسىرىلەدى. سونىمەن قاتار، جەر قويناۋىن پايدالانعانى ءۇشىن تولەم مولشەرلەمەلەرى ليتسەنزيا مەرزىمى مەن ۋچاسكەلەر سانىنا بايلانىستى قايتا قارالادى.
ءماجىلىس دەپۋتاتتارى سالىق كودەكسىنە ەنگىزىلگەن تۇزەتۋلەردى قولداپ داۋىس بەردى. ەندى قۇجات سەناتقا جولدانادى. ەگەر پارلامەنتتىڭ جوعارعى پالاتاسى زاڭدى ماقۇلداسا، ول پرەزيدەنتكە قول قويۋعا جىبەرىلەدى.
