Bügın Mäjılıs deputattary Salyq kodeksıne özgerıster engızu turaly zaŋ jobasyn ekınşı oqylymda qabyldady, dep habarlaidy "Adyrna" ūlttyq portaly.
Mäjılıs deputaty, jūmys tobynyŋ jetekşısı Berık Beisenǧalievtıŋ aituynşa, Salyq kodeksınıŋ jobasy ötken jyly tamyzda Parlamentke ūsynylǧan bastapqy nūsqadan mazmūndyq jaǧynan özgeşe.
«QQS reformasy boiynşa – bastapqyda Ükımet ūsynǧan 20 paiyzdyq mölşerleme 16 paiyzǧa deiın tömendetıldı. QQS boiynşa mındettı tırkeu şegı 15 million teŋgeden 40 million teŋgege deiın köterıldı. Därı-därmekter men medisinalyq qyzmetterge tömendetılgen QQS mölşerlemelerı engızıledı: 2026 jyldan bastap – 5 paiyz, 2027 jyldan bastap – 10 paiyz. Kepıldendırılgen tegın medisinalyq kömek, mındettı äleumettık medisinalyq saqtandyru, sirek kezdesetın jäne äleumettık maŋyzy bar aurulardy emdeu şeŋberındegı tauarlar men qyzmetter QQS-tan bosatylady», – dedı Beisenǧaliev Mäjılıstıŋ jalpy otyrysynda.
QQS-tan äleumettık maŋyzy bar azyq-tülık tauarlary men otandyq kıtaptar, sondai-aq olardy basyp şyǧaru qyzmetterı de bosatylady. Auyl şaruaşylyǧy tauar öndıruşılerın qoldau maqsatynda qosymşa esepke alynatyn QQS kölemı 70 paiyzdan 80 paiyzǧa deiın arttyryldy. Būl olardyŋ salyq jüktemesın azaitady.
«Rūqsat beru jüiesınıŋ ornyna tyiym salynǧan qyzmet türlerınıŋ tızımı engızıledı. Aimaqtyq erekşelıkterdı eskeru maqsatynda mäslihattar 4 paiyzdyq bıryŋǧai mölşerlemenı 50 paiyzǧa deiın özgerte alady. Biznes arasyndaǧy operasiialarǧa arnaiy salyq rejimın qoldanu keŋeitıledı», – dedı deputat.
Būdan bölek, zaŋ jobasynda äleumettık sala ūiymdary üşın korporativtık tabys salyǧynyŋ tömendetılgen mölşerlemelerı belgılenedı: 2026 jyldan bastap – 5 paiyz, 2027 jyldan bastap – 10 paiyz. Mügedektıgı bar adamdar üşın äleumettık salyq şegerımı 5000 AEK-ke deiın ūlǧaityldy (2025 jyly şamamen 19,6 million teŋge).
Qūmar oiyn jäne bank salasyna arnalǧan KTS mölşerlemesı 25 paiyzǧa deiın köterıledı. Degenmen, käsıpkerlık subektılerın nesieleuden tüsetın kırıster boiynşa bankter üşın stavka 20 paiyz deŋgeiınde saqtalady. Jalaqy boiynşa jeke tabys salyǧy üşın progressivtı şkala engızıledı: 8500 AEK-ke deiıngı jyldyq tabysqa – 10 paiyz, odan asqan somaǧa – 15 paiyz; dividend türındegı tabysqa – 230 000 AEK-ke deiın – 5 paiyz, odan joǧary bolsa – 15 paiyz.
«Alkogol, temekı, qyzdyrylatyn temekı önımderı men energetikalyq susyndarǧa aksizderdı kezeŋ-kezeŋımen arttyru turaly şeşım qabyldandy. Būl qadam halyq arasynda salauatty ömır saltyn yntalandyruǧa baǧyttalǧan», – dedı Beisenǧaliev.
Auyl şaruaşylyǧy maqsatyndaǧy jerlerdı tiımsız paidalanǧan jaǧdaida tölem mölşerlemesı 100 ese ösırıledı. Sonymen qatar, jer qoinauyn paidalanǧany üşın tölem mölşerlemelerı lisenziia merzımı men uchaskeler sanyna bailanysty qaita qaralady.
Mäjılıs deputattary Salyq kodeksıne engızılgen tüzetulerdı qoldap dauys berdı. Endı qūjat Senatqa joldanady. Eger Parlamenttıŋ Joǧarǧy palatasy zaŋdy maqūldasa, ol Prezidentke qol qoiuǧa jıberıledı.
