قازاقستاننىڭ بولاشاعى: بىرلىك، دامۋ جانە جاڭعىرۋ

قازاقستان رەسپۋبليكاسى پرەزيدەنتىنىڭ كەڭەسشىسى مالىك وتارباەۆ قازاق ۇلتتىق قىزدار پەداگوگيكالىق ۋنيۆەرسيتەتىنىڭ پروفەسسورلىق-وقىتۋشىلىق قۇرامى مەن ستۋدەنتتەرىمەن كەزدەستى. «قازاقستاننىڭ بولاشاعى: بىرلىك، دامۋ جانە جاڭعىرۋ» تاقىرىبىندا وتكەن اشىق ديالوگ الاڭى مەملەكەت باسشىسى قاسىم-جومارت توقاەۆتىڭ بۋرابايدا وتكەن IV ۇلتتىق قۇرىلتايدا سويلەگەن بايانداماسىن تالقىلاۋعا ارنالدى. كەزدەسۋ بارىسىندا پرەزيدەنت كەڭەسشىسى وقۋ ورنىنا قاسىم-جومارت توقاەۆتىڭ سالەمىن جەتكىزدى. ول پرەزيدەنتتىڭ ۇلتتىق قۇرىلتايداعى بايانداماسىنىڭ ءمانى مەن ماڭىزىن ءتۇسىندىرىپ، ەلدىڭ باستى دامۋ باعدارىن ايقىندايتىن قۇجات رەتىندە قۇرىلتايدىڭ ستراتەگيالىق ءرولىن اتاپ ءوتتى. «پرەزيدەنت كەڭەسشىسى رەتىندە بىرقاتار ايماقتاردا بولدىم. الداعى ۋاقىتتا دا وسىنداي كەزدەسۋلەردى بارلىق وڭىرلەردە جالعاستىرامىز. سەبەبى ۇلتتىق قۇرىلتاي – بۇل تەك پىكىر الماساتىن ورىن ەمەس، بۇل – ناقتى شەشىمدەر قابىلداناتىن، ەل بولاشاعىن ايقىندايتىن ساياسي ينستيتۋت»، – دەدى مالىك وتارباەۆ. QyzPU باسقارما توراعاسى – رەكتورى گۇلميرا قاناي ءوز سوزىندە ۇلتتىق قۇرىلتايدا كوتەرىلگەن وزەكتى ماسەلەلەرگە توقتالىپ، ءبىلىم بەرۋ مەكەمەلەرىنىڭ مەملەكەت پەن قوعام اراسىنداعى سەنىم كوپىرى رەتىندەگى ءرولىن اتاپ ءوتتى. سونداي-اق مەملەكەت باسشىسىنىڭ «ادال ازامات» باستاماسى، ۇلتتىق قۇندىلىقتار مەن رۋحاني تاربيە توڭىرەگىندەگى ۇستانىمدارىن قولدايتىنىن ءبىلدىردى. كەزدەسۋ اياسىندا ۋنيۆەرسيتەت وقىتۋشىلارى مەن بەلسەندى ستۋدەنتتەرى ءوز كوزقاراستارىن ورتاعا سالدى. قازاق ادەبيەتى كافەدراسىنىڭ دوتسەنتى، ف.ع.ك. ءلاززات ادىلبەكوۆا «ۇلتتىق بىرلىك – تۇراقتى دامۋدىڭ نەگىزى» تاقىرىبىندا بايانداما جاساپ، قازاقستان پرەزيدەنتىنىڭ باستامالارى مەن ستراتەگيالىق باعدارلامالارىنا توقتالدى. «قازاقستان – بۇۇ ەلەكتروندى ۇكىمەت رەيتينگى بويىنشا العاشقى 25 مەملەكەتتىڭ قاتارىندا. «ۇلتتىق قور – بالالارعا»، «كەلەشەك» باعدارلاماسى، ساپالى ءبىلىم مەن مەديتسيناعا بولىنگەن قوماقتى ينۆەستيتسيالار – مۇنىڭ بارلىعى ۇلتتىڭ كەلەشەگى ءۇشىن جاسالىپ جاتقان ناقتى قادامدار», – دەدى ءلاززات ادىلبەكوۆا. ول سونداي-اق مەملەكەت باسشىسىنىڭ «ادىلەتتى، قاۋىپسىز، تازا، قۋاتتى قازاقستان» قۇرۋ يدەياسىن قولداپ، بۇل باعىتتاعى ءاربىر ازاماتتىڭ ءرولى ەرەكشە ەكەنىن ايتتى. جيىن سوڭىندا ۋنيۆەرسيتەت ۇجىمى مەملەكەت باسشىسىنىڭ رەفورمالارىن تولىق قولدايتىنىن ءبىلدىرىپ، ۇلتتىق قۇندىلىقتاردى دارىپتەۋگە، ءبىلىم مەن عىلىم سالاسىن دامىتۋعا بەلسەندى ۇلەس قوسا بەرەتىنىن جەتكىزدى. مالىك وتارباەۆ ۋنيۆەرسيتەت ۇجىمىنا ساتتىلىك تىلەپ، ەل بولاشاعى – ءبىلىمدى دە ماقساتشىل جاستاردىڭ، اسىرەسە قازاق قىزدارىنىڭ قولىندا ەكەنىن اتاپ ءوتتى.