Qazaqstannyŋ bolaşaǧy: bırlık, damu jäne jaŋǧyru

Qazaqstan Respublikasy Prezidentınıŋ keŋesşısı Mälık Otarbaev Qazaq ūlttyq qyzdar pedagogikalyq universitetınıŋ professorlyq-oqytuşylyq qūramy men studentterımen kezdestı. «Qazaqstannyŋ bolaşaǧy: bırlık, damu jäne jaŋǧyru» taqyrybynda ötken aşyq dialog alaŋy Memleket basşysy Qasym-Jomart Toqaevtyŋ Burabaida ötken IV Ūlttyq qūryltaida söilegen baiandamasyn talqylauǧa arnaldy. Kezdesu barysynda Prezident keŋesşısı oqu ornyna Qasym-Jomart Toqaevtyŋ sälemın jetkızdı. Ol Prezidenttıŋ Ūlttyq qūryltaidaǧy baiandamasynyŋ mänı men maŋyzyn tüsındırıp, eldıŋ basty damu baǧdaryn aiqyndaityn qūjat retınde qūryltaidyŋ strategiialyq rölın atap öttı. «Prezident keŋesşısı retınde bırqatar aimaqtarda boldym. Aldaǧy uaqytta da osyndai kezdesulerdı barlyq öŋırlerde jalǧastyramyz. Sebebı Ūlttyq qūryltai – būl tek pıkır almasatyn oryn emes, būl – naqty şeşımder qabyldanatyn, el bolaşaǧyn aiqyndaityn saiasi institut», – dedı Mälık Otarbaev. QyzPU Basqarma Töraǧasy – Rektory Gülmira Qanai öz sözınde Ūlttyq qūryltaida köterılgen özektı mäselelerge toqtalyp, bılım beru mekemelerınıŋ memleket pen qoǧam arasyndaǧy senım köpırı retındegı rölın atap öttı. Sondai-aq Memleket basşysynyŋ «Adal azamat» bastamasy, ūlttyq qūndylyqtar men ruhani tärbie töŋıregındegı ūstanymdaryn qoldaitynyn bıldırdı. Kezdesu aiasynda universitet oqytuşylary men belsendı studentterı öz közqarastaryn ortaǧa saldy. Qazaq ädebietı kafedrasynyŋ dosentı, f.ǧ.k. Läzzat Ädılbekova «Ūlttyq bırlık – tūraqty damudyŋ negızı» taqyrybynda baiandama jasap, Qazaqstan Prezidentınıŋ bastamalary men strategiialyq baǧdarlamalaryna toqtaldy. «Qazaqstan – BŪŪ Elektrondy ükımet reitingı boiynşa alǧaşqy 25 memlekettıŋ qatarynda. «Ūlttyq qor – balalarǧa», «Keleşek» baǧdarlamasy, sapaly bılım men medisinaǧa bölıngen qomaqty investisiialar – mūnyŋ barlyǧy ūlttyŋ keleşegı üşın jasalyp jatqan naqty qadamdar», – dedı Läzzat Ädılbekova. Ol sondai-aq Memleket basşysynyŋ «Ädılettı, Qauıpsız, Taza, Quatty Qazaqstan» qūru ideiasyn qoldap, būl baǧyttaǧy ärbır azamattyŋ rölı erekşe ekenın aitty. Jiyn soŋynda universitet ūjymy Memleket basşysynyŋ reformalaryn tolyq qoldaitynyn bıldırıp, ūlttyq qūndylyqtardy därıpteuge, bılım men ǧylym salasyn damytuǧa belsendı üles qosa beretının jetkızdı. Mälık Otarbaev universitet ūjymyna sättılık tılep, el bolaşaǧy – bılımdı de maqsatşyl jastardyŋ, äsırese qazaq qyzdarynyŋ qolynda ekenın atap öttı.