قىتاي حالقى قازاق حالقىنا ەشقاشان زيان كەلتىرگەن جوق، بولاشاقتا دا زيان كەلتىرمەيدى. بۇل مالىمدەمەنى قازاقستان پرەزيدەنتى قاسىم-جومارت توقاەۆ قازاقستان حالقى اسسامبلەياسىنىڭ XXXIV سەسسياسىنىڭ پلەنارلىق وتىرىسىندا ايتتى، دەپ حابارلايدى “ادىرنا” ۇلتتىق پورتالى.
پرەزيدەنت اتاپ وتكەندەي، قازاق قاشاندا كورشىسىن قادىرلەي بىلگەن. قۋانىشتا دا، قيىندىقتا دا كورشىسىنە سۇيەنگەن، كورشىنىڭ قاسىنان تابىلعان.
«كورشى اقىسى – ءتاڭىر حاقىسى» دەگەن ۇعىم دىنىمىزدە جانە داستۇرىمىزدە بار. بۇل – بىزگە اتادان قالعان وسيەت، انادان بەرىلگەن قاسيەت.
حالقىمىزدىڭ تاتۋ كورشىلىك ءداستۇرى ءالى دە جالعاسىپ كەلەدى. قونىستاس ادامدار ۇلتىنا، دىنىنە، تىلىنە قاراماستان ارالاسىپ، قۇرالاسىپ جاتادى. قازاقستان كورشى مەملەكەتتەرمەن دوستىقتى نىعايتا تۇسۋگە ايرىقشا ءمان بەرەدى. رەسەي – قازاقستاننىڭ بۇرىننان كەلە جاتقان نەگىزگى ستراتەگيالىق سەرىكتەسى ءارى سەنىمدى وداقتاسى. قىتاي ەلىمەن ىقپالداستىق تامىرى دا تەرەڭدە جاتىر. قىتاي حالقى قازاق حالقىنا ەشقاشان زيان كەلتىرگەن جوق، بولاشاقتا دا زيان كەلتىرمەيدى. الاتاۋدى تەڭ جايلاعان قىرعىزدار – ءبىر تۋعان باۋىرلارىمىز. ەجەلدەن ەنشىلەس وزبەك اعايىندى ءوز اعام دەپ قادىر تۇتامىز. ءتۇبىمىز ءبىر دەپ تۇرىكمەندەردى تۋىس ساناپ، شىن جۇرەكتەن قۇرمەتتەيمىز. قارت كاسپيدىڭ جاعاسىنداعى ازەربايجان ەلىنە دەگەن ىقىلاسىمىز دا ەرەكشە. ءبىر سوزبەن ايتساق، كورشى ەلدەرمەن قارىم-قاتىناسىمىز باۋىرلاستىق رۋحىندا دامىپ كەلەدى. ءبىزدىڭ ارامىزدا تۇيتكىلدى ماسەلە جوق”، - دەپ اتاپ ءوتتى پرەزيدەنت.
مەملەكەت باسشىسىنىڭ ايتۋىنشا، قازاقستان مەن رەسەي قۇرلىقتاعى ەڭ ۇزىن شەكارانى اۋەل باستان داۋ-دامايسىز شەگەندەپ الدى. جاقىندا قىرعىزستان، وزبەكستان جانە تاجىكستان ۇزاق جىل بويى شەشىمىن تاپپاعان شەكارا ماسەلەسى بويىنشا ورتاق مامىلەگە كەلىپ، تاريحي كەلىسىمگە قول قويدى دەپ ايتۋعا بولادى.
ء“بىز باۋىرلاس ەلدەر ءۇشىن قۋانامىز، ولاردى ءاردايىم قولدايمىز”، - دەدى پرەزيدەنت وتىرىستا.
