ۇلتتىق كىتاپ كۇنى – بۇل رۋحاني بايلىققا باس يەتىن، ادەبيەتتىڭ قۇدىرەتىن دارىپتەيتىن ەرەكشە كۇن. مەملەكەتتىك قۋىرشاق تەاترى بۇل مەرەكەنى كىتاپ پەن تەاتر اراسىنداعى التىن كوپىردى جالعاۋ ارقىلى اتاپ ءوتۋدى ءجون كوردى.
23 ءساۋىر – ۇلتتىق كىتاپ كۇنىنە وراي، الماتى مەملەكەتتىك قۋىرشاق تەاترى كورەرمەندەرگە ەرەكشە سىي جاساماق. الەمگە ايگىلى نەمىس جازۋشىسى وتفريد پرويسلەردىڭ بالالار ادەبيەتىندەگى جاۋھارى سانالاتىن «كىشكەنتاي سيقىرشى» پوۆەسىنىڭ جەلىسىمەن ساحنالانعان «ورمان عاجايىپتارى» اتتى جاڭا قويىلىمنىڭ پرەمەراسىن ۇسىنباق. بالالار ادەبيەتىنىڭ التىن قورىنان ورىن العان بۇل شىعارما – جاقسىلىق پەن زۇلىمدىق، باتىلدىق پەن مەيىرىم، ادالدىق پەن ىزگىلىك تاقىرىپتارىن قوزعايتىن ويلى تۋىندى. . ەرتەگى كەيىپكەرلەرىنىڭ ساحناعا شىعۋى – كىتاپقا دەگەن سۇيىسپەنشىلىكتى جاڭا دەڭگەيگە كوتەرۋدىڭ جارقىن ۇلگىسى.
سپەكتاكلدىڭ رەجيسسەرى — ەلىمىزدەگى قۋىرشاق تەاتر رەجيسسۋراسىنىڭ دامۋىنا سۇبەلى ۇلەس قوسىپ جۇرگەن، ەرەكشە دارىنىمەن تانىلعان تالانتتى ونەر يەسى انتون زايتسەۆ. ونىڭ شىعارماشىلىق جەتەكشىلىگىمەن الماتى مەملەكەتتىك قۋىرشاق تەاترىنىڭ رەپەرتۋارى «انا جۇرەگى»، «اباي. مەن ءبىر جۇمباق اداممىن...»، «ۇيشىك»، «باۋىرساق»، ت.ب. جاڭا تىنىس الىپ، زاماناۋي رەجيسسەرلىك شەشىمدەر مەن تىڭ شىعارماشىلىق باعىتتار ارقىلى جاڭاشا تۇرلەنىپ، وزگەشە لەپكە يە بولدى.
قويىلىمنىڭ ساحنالىق كوركەمدەۋىن جاساعان – اقتوبە وبلىستىق قۋىرشاق تەاترىنىڭ ديرەكتورى، قازاقستاننىڭ مادەنيەت قايراتكەرى، حالىقارالىق جانە رەسپۋبليكالىق قۋىرشاق تەاتر فەستيۆالدەرىنىڭ بىرنەشە مارتە «ۇزدىك سۋرەتشى» نوميناتسياسى بويىنشا جەڭىمپازى ءاسيا قۇرمانالينا. ونىڭ بەينەلىك شەشىمدەرى مەن ساحنالىق كەڭىستىكتى تاني بىلەتىن كاسىبي تالعامى سپەكتاكلدىڭ ەستەتيكالىق دەڭگەيىن ايرىقشا بيىككە كوتەرەدى. سپەكتاكلدىڭ مۋزىكالىق الەمىن كومپوزيتسيالىق ۇيلەسىممەن ارلەگەن – اندرەي دولگورۋكوۆ، ال ساحنالىق قوزعالىس پەن پلاستيكالىق كورىنىستەردى حورەوگرافيالىق تاسىلدەر ارقىلى مازمۇندى ەتكەن – ارستان تۋيجانوۆ.
ايتا كەتەرلىگى، جاڭا قويىلىمدا 15-تەن اسا ءتۇرلى قۋىرشاق ءتۇرى ساحنا تورىنەن ورىن الادى! كورەرمەن قاۋىم پلانشەتتى، تروستى، پاركەتتى، بويلى سىندى سان الۋان قۋىرشاق تۇرلەرىنىڭ سيقىرلى الەمىنە ەنىپ، ءاربىر كەيىپكەردىڭ بولمىسى مەن مىنەزىنە تەرەڭ ۇڭىلۋگە مۇمكىندىك الادى. ءار قۋىرشاقتىڭ وزىندىك پلاستيكاسى مەن بەينەلىك شەشىمى ارقىلى سپەكتاكل كوركەمدىك تۇرعىدان بايىپ، كورەرمەنگە ەرەكشە ەستەتيكالىق اسەر سىيلايدى.
اتالمىش پرەمەرا اياسىندا الماتى قالاسىنىڭ ورتالىقتاندىرىلعان كىتاپحانا جۇيەسىمەن بىرلەسىپ مازمۇندى مادەني شارا ۇيىمداستىرىلادى. پرەمەرا الدىندا كورەرمەن قاۋىمعا ارنايى دايىندالعان كىتاپ كورمەسى ۇسىنىلادى. بۇل كورمەنىڭ ماقساتى – جاس كورەرمەندەردىڭ كىتاپقا دەگەن قىزىعۋشىلىعىن وياتىپ، ادەبيەتكە دەگەن سۇيىسپەنشىلىگىن ارتتىرۋ، ولاردىڭ رۋحاني دامۋىنا جول اشۋ.
تەاتر ورداسى كىتاپ پەن تەاتردى ۇندەستىرە وتىرىپ وتەتىن پرەمەراعا الماتى قالاسىنىڭ تۇرعىندارى مەن قوناقتارىن ادەبي مۇرا مەن ساحنالىق ونەردى قاتار تاماشالاۋعا شاقىرادى. بۇل باستاما كورەرمەننىڭ مادەني تالعامىن بايىتىپ قانا قويماي، كىتاپ وقۋعا دەگەن ىنتاسىن ارتتىرۋعا باعىتتالعان ماڭىزدى قادام بولماق.
گۇلىم كوپبايقىزى
