بۇگىن الماتىدا وتكەن مارافون كەزىندە ەكى قاتىسۋشى قازا تاپتى، دەپ حابارلايدى "ادىرنا" ۇلتتىق پورتالى Almaty Marathon رەسمي سايتىنا سىلتەمە جاساپ.
رەسمي دەرەكتەرگە سايكەس، 20 ءساۋىر كۇنى وتكەن Almaty Half Marathon كەزىندە 84 جاستاعى اققويان رىساليەۆ پەن 21 جاستاعى نۇربول احمادي قايتىس بولدى. ەكەۋى دە 21,1 شاقىرىمدىق جارتىلاي مارافون قاشىقتىعىن ەڭسەرۋگە قاتىسقان جانە الماتىداعى جۇگىرۋ شارالارىنا ۇنەمى قاتىسىپ جۇرگەن.
ۇيىمداستىرۋشىلار بارلىق ەرەجەلەرگە ساي ارەكەت ەتكەنىن مالىمدەدى. مەديتسينالىق قىزمەت، جەدەل جاردەم جانە پوليتسيا جەدەل تۇردە وقيعا ورنىنا جەتكەن. الايدا قابىلدانعان شارالارعا قاراماستان، ولاردىڭ ءومىرىن امان الىپ قالۋ مۇمكىن بولماعان.
جارتىلاي مارافون 20 ءساۋىر كۇنى تاڭەرتەڭ ءبىرىنشى پرەزيدەنت ساياباعىنان ورتالىق ستاديونعا دەيىنگى باعىتتا ءوتتى. اققويان رىساليەۆ 2021 جىلدان بەرى جۇگىرۋ جارىستارىنا تۇراقتى تۇردە قاتىسىپ كەلگەن. بۇعان دەيىن ول Almaty Half Marathon جانە Almaty Marathon اياسىندا 21,1 جانە 10 شاقىرىمدىق قاشىقتىقتاردى ءساتتى ەڭسەرگەن.
مارافون كەزىندە ءال-فارابي داڭعىلى بويىنداعى ءبىرىنشى شاقىرىمدا ول ادام ءوزىن جايسىز سەزىنگەن. ءبىر مينۋتتىڭ ىشىندە جەدەل جاردەم جەتكەن، الايدا ونىڭ تامىرى سوقپاعان.
"08:15-تە پوليتسيا قىزمەتكەرلەرى قاتىسۋشىنىڭ قۇلاعانىن حابارلادى. جەدەل جاردەم ءبىر مينۋت ىشىندە جەتتى، پۋلس بولمادى. رەانيماتسيالىق شارالار حاتتاماعا ساي جۇرگىزىلدى. الدىن الا دياگنوز – وكپە ارتەرياسىنىڭ ترومبوەمبولياسى. سوزىلمالى ارتەريالىق گيپەرتەنزياسى بولعان", – دەدى جەدەل جاردەم دارىگەرى الىبەك حوجانازاروۆ.
قايتىس بولعان ەكىنشى مارافون قاتىسۋشىسى – نۇربول احمادي – بۇعان دەيىن Winter Run 2025 اياسىنداعى 10 شاقىرىمدىق جارىسقا قاتىسقان. ول استانا مەن الماتىداعى جارتىلاي مارافوندارعا جانە الماتى مارافونىنا تىركەلگەن.
20 ءساۋىر كۇنى مارافون بارىسىندا 16-شى شاقىرىمدا جۇگىرىپ كەلە جاتقان نۇربول ەسىنەن تانىپ قالعان. جەدەل جاردەم قىزمەتكەرلەرى رەانيماتسيالىق كومەك كورسەتكەنىمەن، ناتيجە بولماعان – ءولىم بريگادا كەلگەنگە دەيىن تىركەلگەن.
ء"بىز كەلگەن كەزدە، 09:18-دە، ۇيقى ارتەرياسىندا پۋلس بولمادى، تىنىس الۋى جوق، قان قىسىمى ءنول. رەانيماتسيالىق شارالار حاتتاماعا ساي جۇرگىزىلدى، بىراق ءساتسىز بولدى. ءولىم 103 بريگاداسى كەلگەنگە دەيىن ورىن العان. الدىن الا دياگنوز – وكپە ارتەرياسىنىڭ ترومبوەمبولياسى، جۇرەكتىڭ ءجىتى جەتىسپەۋشىلىگى", – دەپ ءتۇسىندىردى بريگادا دارىگەرى ايگەرىم ەسداۋلەتوۆا.
مەديتسينا قىزمەتكەرلەرىنىڭ ايتۋىنشا، ناقتى ءولىم سەبەبى سوت-مەديتسينالىق ساراپتاما ناتيجەسى بويىنشا انىقتالادى جانە جاقىندارىنا جاقىن ۋاقىتتا حابارلاناتىن بولادى.
«ءبىرىنشى بولۋ باتىلدىق» كورپوراتيۆتىك قورىنىڭ اتقارۋشى ديرەكتورى سالتانات قازىباەۆا قاتىسۋشىلاردىڭ قاۋىپسىزدىگى – ۇيىمداستىرۋشىلار ءۇشىن باسىمدىق ەكەنىن اتاپ ءوتتى.
"جۇگىرۋگە تىركەلۋ كەزىندە بارلىق قاتىسۋشىلار وزدەرىنىڭ سپورتتىق شاراعا قاتىسۋعا فيزيكالىق تۇرعىدا دايىن ەكەنىن جانە دەنساۋلىعىنا تولىق جاۋاپتى ەكەنىن راستايتىن قولحاتقا قول قويادى. بۇل – الەمدەگى مارافونداردى ۇيىمداستىرۋدا قولدانىلاتىن قالىپتى تاجىريبە. Almaty Marathon قاتىسۋشىلارى ءۇشىن جىل بويى ءبىز تەگىن جاتتىعۋلار مەن قاۋىپسىز جۇگىرۋ تۋرالى ساراپشىلارمەن اشىق دارىستەر وتكىزەمىز. جارىس كۇنى ءاربىر سۋ ءىشۋ بەكەتىندە العاشقى مەديتسينالىق كومەك كورسەتۋگە قاجەتتى قۇرال-جابدىقتارمەن جابدىقتالعان مەديتسينا قىزمەتكەرلەرى بولادى. بارلىق جۇگىرۋ مارشرۋتتارى الدىن الا مۇقيات ازىرلەنىپ، پوليتسيا جانە جەدەل مەديتسينالىق جاردەم قىزمەتىمەن كەلىسىلىپ جاسالادى", – دەدى سالتانات قازىباەۆا.
«ءبىرىنشى بولۋ باتىلدىق» كورپوراتيۆتىك قورى قازا تاپقانداردىڭ وتباسىنا قايعىرا كوڭىل ايتادى. ۇيىمداستىرۋشىلار مارقۇمداردىڭ وتباسىلارىمەن بايلانىسقا شىعىپ، ماتەريالدىق كومەك كورسەتۋدى جوسپارلاپ وتىر.
