2025 جىلدىڭ 17 ساۋىرىندە جەزقازعان قالاسىندا “ۇلتتىق كيىم – ۇلت بەينەسى” اتتى ءداستۇرلى جانە زاماناۋي ۇلتتىق كيىم ۇلگىلەرىنىڭ فەستيۆالى تابىستى ءوتتى. اۋقىمدى مادەني شارا قازاق حالقىنىڭ باي كيىم مادەنيەتىن جاڭعىرتۋ، ونى زاماناۋي سانمەن ۇندەستىرە وتىرىپ ۇلت بولمىسىنىڭ بەينەسىن ناسيحاتتاۋعا باعىتتالدى.
فەستيۆال اياسىندا ۇلتتىق كيىمنىڭ حالقىمىزدىڭ رۋحاني-مادەني قۇندىلىقتارىن ايشىقتاپ، ءداستۇر مەن ءدىندى ۇيلەستىرەتىن رولىنە ەرەكشە نازار اۋدارىلدى. ۇلتتىق كيىم – ۇلتتىڭ وزىندىك بولمىسى مەن سالت-ساناسىن دارىپتەيتىن سيمۆول رەتىندە، تەرىس ءدىني اعىمداردىڭ ىقپالىنا قارسى قوعامدا يممۋنيتەت قالىپتاستىرۋ قۇرالى بولا الاتىنى ەرەكشە اتاپ ءوتىلدى.
سالتاناتتى اشىلۋ بارىسىندا:
• ۇلتتىق ناقىشپەن بەزەندىرىلگەن ساحنا مەن كيىمدەر كورمەسى ۇيىمداستىرىلدى;
• تانىمال وتاندىق ديزاينەرلەردىڭ توپتامالارى جۇرت نازارىنا ۇسىنىلدى;
• حالىقارالىق دەڭگەيدەگى Aida KaumeNOVA ءسان ءۇيىنىڭ توپتاماسى كوپشىلىكتىڭ ەرەكشە ىقىلاسىنا يە بولدى.
قۇرمەتتى قوناقتار قاتارىندا:
• ۇلىتاۋ وبلىسى اكىمىنىڭ ورىنباسارى زينا جۇمانازارقىزى اقىلبەكوۆا
• قوعام قايراتكەرى، بەلگىلى تەلەجۋرناليست دانا نۇرجىگىت
• استانا قالاسىنداعى “ىرىسكەلدى قاجى” مەشىتىنىڭ باس يمامى، ءدىنتانۋشى نۇرلان بايجىگىتۇلى
• الماتى قالاسىنان ارنايى شاقىرىلعان ديزاينەرلەر مادينا بەكتاي مەن بەكباتىر گۇلنۇر بولدى.
قوناقتار ءوز سوزدەرىندە ۇلتتىق كيىم – تەك ءسان ەلەمەنتى ەمەس، ۇلتتىڭ رۋحاني-مادەني تامىرىنىڭ كورىنىسى ەكەنىن اتاپ ءوتتى. ولار مۇنداي باستامالار جاستاردىڭ ءدىني ساۋاتتىلىعىن ارتتىرىپ، جات يدەولوگيالاردان قورعاۋعا سەپ بولاتىنىن جەتكىزدى.
فەستيۆال باعدارلاماسى اياسىندا:
• زاماناۋي ۇلگىدەگى ۇلتتىق كيىمدەردىڭ دەفيلەسى ۇيىمداستىرىلدى;
• ديزاينەرلەردىڭ شىعارماشىلىعى مەن شەبەرلىگى تانىستىرىلدى;
• ۇلتتىق ونەر مەن سالت-ءداستۇردى ۇلىقتاعان ساحنالىق قويىلىمدار ۇسىنىلدى;
• قولونەرشىلەر جارمەڭكەسى ءوتتى;
• قوناقتار مەن قاتىسۋشىلار ماراپاتتارمەن جانە العىس حاتتارمەن ماراپاتتالدى.
ايتا كەتەيىك، فەستيۆالدە ۇسىنىلعان ۇلتتىق كيىم توپتامالارى 2025 جىلدىڭ 18 ءساۋىر كۇنى جەزقازعان قالاسىنداعى “پلازا” ساۋدا ۇيىندە ساتىلىمعا شىعارىلادى. بۇل – ۇلتتىق كيىمنىڭ كۇندەلىكتى ومىرگە ەنۋىنە جاسالعان ناقتى قادام.
ءىس-شارانى ۇيىمداستىرۋشى:
ۇلىتاۋ وبلىسىنىڭ ءدىن ىستەرى باسقارماسى
ماقساتى:
ۇلتتىق كيىم ارقىلى رۋحاني جانە مادەني قۇندىلىقتاردى جاڭعىرتۋ، سونداي-اق تەرىس ءدىني اعىمدارعا قارسى قوعامدا يممۋنيتەت قالىپتاستىرۋ.