2025 جىلعى 17 ساۋىردە تالعار قالاسىندا 16 جاستاعى شەرزات پولاتتى ءولتىرۋ ءىسى بويىنشا باستى سوت وتىرىسى باستالدى، دەپ حابارلايدى “ادىرنا” ۇلتتىق پورتالى.
رەزونانس تۋدىرعان ءىس تالدىقورعاندا قارالۋدا. باستاپقىدا سوت وتىرىسى ساعات 10:00-دە باستالۋى ءتيىس بولعان، الايدا ءبىر تاراپتىڭ ادۆوكاتى كەشىگىپ كەلۋىنە بايلانىستى وتىرىس 30 مينۋتتان استام ۋاقىتقا كەشىكتىرىلدى.
سوت توراعاسى بارلىق قاتىسۋشىلاردى سوتقا ۋاقىتىلى كەلۋگە شاقىرىپ، ادۆوكاتقا ەسكەرتۋ جاسادى. ەگەر مۇنداي جاعداي تاعى قايتالانسا، ونى سوتتى قۇرمەتتەمەۋ بابى بويىنشا جاۋاپكەرشىلىككە تارتاتىنىن ايتتى.
جوعارعى سوت بۇل ءىستىڭ ونلاين-ترانسلياتسياسىن ۇيىمداستىرعان.
ەسكە سالا كەتەيىك، 2024 جىلدىڭ 4 قازانىندا تالعار قالاسىندا ورنالاسقان “قاماجاي” دۇكەنىندە تۇنگى ۋاقىتتا جانجال شىعىپ، توبەلەسكە ۇلاسقان. وقيعا سالدارىنان ەكى ادام اۋداندىق اۋرۋحاناعا جەتكىزىلىپ، ونىڭ ءبىرى – شەرزات پولات العان جاراقاتتارىنان رەانيماتسيا بولىمىندە كوز جۇمعان.
اتالعان ءىس بويىنشا 9 ادام سوت الدىندا جاۋاپ بەرۋدە. الدىن الا تىڭداۋدا پروكۋرور ايىپتاۋ اكتىسىن جاريالاپ، وقيعانىڭ ەگجەي-تەگجەيىن بايانداعان.
سوت پروتسەسىنىڭ اشىقتىعىن قامتاماسىز ەتۋ ماقساتىندا بارلىق وتىرىستار ونلاين كورسەتىلەدى.
