ءۇش جىل بۇرىن قازاقستان پرەزيدەنتى قاسىم-جومارت توقاەۆ تاپسىرعان كاسپي تەڭىزىن زەرتتەيتىن عىلىمي ينستيتۋت قاشان قۇرىلادى؟ بۇل تۋرالى سۋ رەسۋرستارى جانە يرريگاتسيا مينيسترلىگىنەن سۇراپ بىلدىك.
2022 جىلدىڭ قاراشا ايىندا مەملەكەت باسشىسى قازاقستاندا كاسپي تەڭىزىن زەرتتەيتىن عىلىمي ينستيتۋت قۇرۋدى ۇسىنعان بولاتىن. ۇكىمەت 2024 جىلدىڭ قاڭتارىندا وسى جوبانى رەسمي تۇردە ماقۇلدادى، بىراق ينستيتۋت ءالى جۇمىسىن باستاعان جوق.
سۋ رەسۋرستارى جانە يرريگاتسيا مينيسترلىگىنە “ادىرنا” ۇلتتىق پورتالى ساۋال جولدادى.
مينيسترلىكتىڭ مالىمەتىنشە، ينستيتۋت قۇرىلىپ قويعان.
“مەملەكەت باسشىسىنىڭ 2022 جىلعى 7 قاراشاداعى تاپسىرماسىن ورىنداۋ ماقساتىندا قازاقستان رەسپۋبليكاسى ۇكىمەتىنىڭ 2024 جىلعى 25 قاڭتارداعى No36 قاۋلىسىنا سايكەس «كاسپي تەڭىزىنىڭ قازاق عىلىمي-زەرتتەۋ ينستيتۋتى» كوممەرتسيالىق ەمەس اكتسيونەرلىك قوعامى قۇرىلدى. ينستيتۋت قىزمەتىنىڭ نەگىزگى باعىتتارى كاسپي تەڭىزىنىڭ تابيعي رەسۋرستارىن ساقتاۋ جانە مولايتۋ ماقساتىندا كاسپي تەڭىزىنىڭ قازاقستاندىق سەكتورىندا ەكولوگيالىق مونيتورينگ پەن عىلىمي-زەرتتەۋ جۇمىستارىن جۇرگىزۋگە، كاسپي ماڭى مەملەكەتتەرىنىڭ عىلىمي-زەرتتەۋ ينستيتۋتتارى مەن ۇيىمدارى اراسىنداعى ىنتىماقتاستىقتى نىعايتۋعا باعىتتالعان. قازاقستان رەسپۋبليكاسى ۇلتتىق ەكونوميكا مينيسترلىگى ينستيتۋتتىڭ باسقارۋ جونىندەگى قىزمەتتى جۇزەگە اسىرۋ بويىنشا فۋنكتسيونالدىق تالداۋ جۇرگىزدى جانە وسى تالداۋعا سايكەس ينستيتۋتتى ەكولوگيا جانە تابيعي رەسۋرستار مينيسترلىگىنىڭ قاراماعىنا بەرۋدىڭ ورىندىلىعى تۋرالى قورىتىندى جىبەردى. وسىعان بايلانىستى «قازاقستان رەسپۋبليكاسى ۇكىمەتىنىڭ كەيبىر شەشىمدەرىنە وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى ۇكىمەتىنىڭ 2024 جىلعى 6 جەلتوقسانداعى No1031 قاۋلىسىمەن ينستيتۋت ەكولوگيا جانە تابيعي رەسۋرستار مينيسترلىگىنىڭ قاراماعىنا بەرىلدى”، - دەپ حابارلادى مينيسترلىك.
ال ماڭعىستاۋ وبلىسىنىڭ ەكولوگيا دەپارتامەنتى 2024 جىلى ينستيتۋتقا ارناپ، قالادان عيمارات بەرىلگەنىن، الايدا وعان بىلىكتى عالىم-ماماندار جەتىسپەيتىنىن مالىمدەدى.
ايتا كەتەيىك، كاسپيدى زەرتتەيتىن عىلىمي ينستيتۋت تەڭىزگە شەكارالا بەس مەملەكەتتىڭ تورتەۋىندە بار. تەك قازاقستاندا جوق.
