قازاق گاز وڭدەۋ زاۋىتىنىڭ بۇرىنعى ديرەكتورى بولات بايشۋاقوۆ سوتتالدى. بۇل تۋرالى بۇگىن، 14 ساۋىردە سىبايلاس جەمقورلىققا قارسى ءىس-قيمىل اگەنتتىگى ايتتى، دەپ حابارلايدى «ادىرنا» ءتىلشىسى.
ەكس-باسشى كاسىپورىننىڭ سەنىپ تاپسىرىلعان مۇلكىن اۋكتسيون وتكىزبەستەن زاڭسىز ساتۋ جانە تۇسكەن قاراجاتتى يەمدەنۋ ارقىلى ءىرى مولشەردە جىمقىرعانى ءۇشىن كىنالى دەپ تانىلعان.
«ول 4 جىلعا باس بوستاندىعىنان ايىرىلدى جانە ءومىر بويى مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە قىزمەت اتقارۋ قۇقىعىنان ايىرىلدى. سوت اكتىسى زاڭدى كۇشىنە ەنگەن جوق»،—دەلىنگەن حابارلامادا.
ايتا كەتەيىك، 2023 جىلى اقپان ايىنىڭ باسىندا بولات بايشۋاقوۆ «قازاق گاز وڭدەۋ زاۋىتى» اق ديرەكتورى بولىپ تاعايىندالعان ەدى. 2024 جىلدىڭ تامىزىندا ونىڭ جەمقورلىق بويىنشا كۇدىككە ىلىنگەنى بەلگىلى بولدى. سول كەزدە بۇرىنعى ديرەكتور مەملەكەتكە 65 ملن تەڭگە زالال كەلتىرگەنى ايتىلدى.
