اقمولا وبلىسىندا 12 قاج (قىلمىستىق-اتقارۋ جۇيەسى) قىزمەتكەرىنە قاتىستى اتىشۋلى ىستەگى ۇكىمنىڭ كۇشى جويىلدى. بۇل تۋرالى اقمولا وبلىستىق سوتىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
قىلمىستىق ىستەر جونىندەگى سوت القاسى مامانداندىرىلعان اۋدانارالىق سوتتىڭ القابيلەر شىعارعان ۇكىمىن جويدى. ءىس اتباسار اۋداندىق قاج قىزمەتكەرلەرىنە قاتىستى، ولار قىلمىستىق كودەكستىڭ 146-بابى 3-ءبولىمى 1-تارماعى — "ادامدار توبىنىڭ ازاپتاۋ قولدانۋى" بويىنشا ايىپتالعان.
تەرگەۋ نۇسقاسى بويىنشا، كولونيا قىزمەتكەرلەرى اتباسار قالاسىنداعى تۇزەۋ مەكەمەسىندە جازاسىن وتەپ جاتقان سوتتالعاندارعا زاڭسىز كۇش قولدانعان.
بۇعان دەيىن القابيلەر قۇرامىنىڭ شەشىمىمەن ايىپتالۋشىلار قىلمىس قۇرامى بولماعاندىقتان اقتالعان ەدى. الايدا وبلىستىق سوت بۇل ۇكىمدى جويدى. سوت ۇكىمنىڭ كۇشىن جويۋ سەبەبى رەتىندە پروتسەستىك زاڭبۇزۋشىلىقتاردى اتادى.
سوتتىڭ ءباسپاسوز قىزمەتىنىڭ مالىمەتىنشە، القابيلەردىڭ قاتىسۋىمەن تالقىلانباۋى ءتيىس ماسەلەلەر سوت پروتسەسىندە قارالعان. بۇل زارداپ شەككەن تاراپتىڭ پىكىرىنە اسەر ەتۋى مۇمكىن ەدى. سونىمەن قاتار، بارلىق جابىرلەنۋشىگە جارىسسوزگە قاتىسۋعا مۇمكىندىك بەرىلمەگەن.
ء"ىس سول سوتتا، بىراق باسقا سۋديا قۇرامىمەن قايتا قاراۋعا جولداندى", – دەدى اقمولا وبلىستىق سوتىنىڭ ءباسپاسوز قىزمەتى.
ايتا كەتەيىك، 2024 جىلعى 12 اقپاندا اقمولا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى القابيلەردىڭ شەشىمىنە سۇيەنە وتىرىپ، قاج دەپارتامەنتىنىڭ "№1 مەكەمە" بۇرىنعى 12 قىزمەتكەرىن اقتاۋ تۋرالى ۇكىم شىعارعان.
اتباسار قالاسىنداعى كولونيا قىزمەتكەرلەرى سوتتالعانداردى ازاپتادى دەگەن كۇدىككە ىلىنگەن بولاتىن. 2023 جىلعى قىركۇيەكتە الەۋمەتتىك جەلىلەردە سوتتالعانداردى ۇرىپ-سوعۋ بەينەجازبالارى تاراپ كەتكەن ەدى.
