FlyArystan رەيسىندە بورتسەرىككە قول كوتەرگەن جانە بومبا تۋرالى جالعان اقپارات تاراتقان جولاۋشى 3 جىلعا سوتتالدى. سوت ۇكىمى زاڭدى كۇشىنە ەندى. بۇل تۋرالى 7 ساۋىردە استانا قالالىق سوتىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
بۇگىن استانا قالالىق سوتى ەر ادامنىڭ ادۆوكاتىنىڭ استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ 2025 جىلعى 20 اقپانداعى ۇكىمىنە بەرىلگەن اپەللياتسيالىق شاعىمىن قارادى.
سوت ۇكىمىمەن جولاۋشى تەرروريزم اكتىسى تۋرالى كورىنەۋ جالعان حابارلاعانى (قك 273-بابى) جانە اۋە كەمەسىنىڭ بورتىندا بۇزاقىلىق جاساعانى ءۇشىن (قك 293-بابى 2-بولىگىنىڭ 4) تارماعى)بويىنشا كىنالى دەپ تانىلىپ، قىلمىستىق قۇقىق بۇزۋشىلىقتار جيىنتىعى بويىنشا 3 جىلعا باس بوستاندىعىنان ايىرىلعان بولاتىن.
ءبىرىنشى ساتىداعى سوتتا ت. ۇشاق بورتىندا بۇزاقىلىق جاساپ، قوعامدىق ءتارتىپتى ەرەكشە ورەسكەل بۇزىپ، اۋە كەمەسىنىڭ بورتسەرىگىنە كۇش كورسەتىپ، ونى ۇرىپ-سوعىپ جانە جولاۋشىنىڭ ەسكەرتۋىن ەلەمەستەن، ونى دا ۇرىپ-سوعىپ، ەكى جابىرلەنۋشىگە دە دەنە جاراقاتىن كەلتىرگەنى انىقتالدى. ەر ادامدى رەيستەن قالدىرۋ بارىسىندا ول تەرروريزم اكتىسى تۋرالى كورىنەۋ جالعان حابارلاعان.
«اپەللياتسيالىق شاعىمدا سوتتالعاننىڭ ادۆوكاتى باس بوستاندىعىنان ايىرۋعا بايلانىستى ەمەس جازا تاعايىنداۋدى سۇرادى. قىلمىستىق ىستەر جونىندەگى اپەللياتسيالىق القا سوتتالعانعا قاتىستى ۇكىمدى وزگەرىسسىز قالدىردى»،—دەلىنگەن حابارلامادا.
ايتا كەتەيىك، وقىس وقيعا 13 قاڭتاردا بولعان ەدى.
