FlyArystan reisınde bortserıkke qol kötergen jäne bomba turaly jalǧan aqparat taratqan jolauşy 3 jylǧa sottaldy. Sot ükımı zaŋdy küşıne endı. Būl turaly 7 säuırde Astana qalalyq sotynyŋ baspasöz qyzmetı aitty, dep habarlaidy «Adyrna» tılşısı.
Bügın Astana qalalyq soty er adamnyŋ advokatynyŋ Astana qalasynyŋ qylmystyq ıster jönındegı audanaralyq sotynyŋ 2025 jylǧy 20 aqpandaǧy ükımıne berılgen apelliasiialyq şaǧymyn qarady.
Sot ükımımen jolauşy terrorizm aktısı turaly körıneu jalǧan habarlaǧany (QK 273-baby) jäne äue kemesınıŋ bortynda būzaqylyq jasaǧany üşın (QK 293-baby 2-bölıgınıŋ 4) tarmaǧy)boiynşa kınälı dep tanylyp, qylmystyq qūqyq būzuşylyqtar jiyntyǧy boiynşa 3 jylǧa bas bostandyǧynan aiyrylǧan bolatyn.
Bırınşı satydaǧy sotta T. ūşaq bortynda būzaqylyq jasap, qoǧamdyq tärtıptı erekşe öreskel būzyp, äue kemesınıŋ bortserıgıne küş körsetıp, ony ūryp-soǧyp jäne jolauşynyŋ eskertuın elemesten, ony da ūryp-soǧyp, ekı jäbırlenuşıge de dene jaraqatyn keltırgenı anyqtaldy. Er adamdy reisten qaldyru barysynda ol terrorizm aktısı turaly körıneu jalǧan habarlaǧan.
«Apelliasiialyq şaǧymda sottalǧannyŋ advokaty bas bostandyǧynan aiyruǧa bailanysty emes jaza taǧaiyndaudy sūrady. Qylmystyq ıster jönındegı apelliasiialyq alqa sottalǧanǧa qatysty ükımdı özgerıssız qaldyrdy»,—delıngen habarlamada.
Aita keteiık, oqys oqiǧa 13 qaŋtarda bolǧan edı.
