FlyArystan reısinde bortserikke qol kótergen jáne bomba týraly jalǵan aqparat taratqan jolaýshy 3 jylǵa sottaldy. Sot úkimi zańdy kúshine endi. Bul týraly 7 sáýirde Astana qalalyq sotynyń baspasóz qyzmeti aıtty, dep habarlaıdy «Adyrna» tilshisi.
Búgin Astana qalalyq soty er adamnyń advokatynyń Astana qalasynyń qylmystyq ister jónindegi aýdanaralyq sotynyń 2025 jylǵy 20 aqpandaǵy úkimine berilgen apellıaııalyq shaǵymyn qarady.
Sot úkimimen jolaýshy terrorızm aktisi týraly kórineý jalǵan habarlaǵany (QK 273-baby) jáne áýe kemesiniń bortynda buzaqylyq jasaǵany úshin (QK 293-baby 2-bóliginiń 4) tarmaǵy)boıynsha kináli dep tanylyp, qylmystyq quqyq buzýshylyqtar jıyntyǵy boıynsha 3 jylǵa bas bostandyǵynan aıyrylǵan bolatyn.
Birinshi satydaǵy sotta T. ushaq bortynda buzaqylyq jasap, qoǵamdyq tártipti erekshe óreskel buzyp, áýe kemesiniń bortserigine kúsh kórsetip, ony uryp-soǵyp jáne jolaýshynyń eskertýin elemesten, ony da uryp-soǵyp, eki jábirlenýshige de dene jaraqatyn keltirgeni anyqtaldy. Er adamdy reısten qaldyrý barysynda ol terrorızm aktisi týraly kórineý jalǵan habarlaǵan.
«Apellıaııalyq shaǵymda sottalǵannyń advokaty bas bostandyǵynan aıyrýǵa baılanysty emes jaza taǵaıyndaýdy surady. Qylmystyq ister jónindegi apellıaııalyq alqa sottalǵanǵa qatysty úkimdi ózgerissiz qaldyrdy»,—delingen habarlamada.
Aıta keteıik, oqys oqıǵa 13 qańtarda bolǵan edi.
