الماتى قالاسىنىڭ اكىمى ەربولات دوساەۆ شاھارداعى جارىقتاندىرۋ، اباتتاندىرۋ جانە سۋمەن جابدىقتاۋ ماسەلەلەرىنە بايلانىستى ەكى اپتادا ءبىر رەت پرەزيدەنت قاسىم-جومارت توقاەۆقا ەسەپ بەرىپ وتىرادى. بۇل تۋرالى اقوردانىڭ ءباسپاسوز حاتشىسى رۋسلان جەلدىباي جازدى، دەپ حابارلايدى «ادىرنا» ءتىلشىسى.
ايتۋىنشا، الماتى اكىمىنە ەلىمىزدىڭ ەڭ ءىرى قالاسىنىڭ قارجى، سپورت، تۋريستىك ءارى مادەني حابىرەتىندەگى مارتەبەسىن نىعايتۋ جانە ءتيىستى تارتىپكە كەلتىرۋ ءۇشىن باسقارۋ قىزمەتىن كۇشەيتۋ تاپسىرىلعان.
«مەملەكەت باسشىسى "تازا قازاقستان" اكتسياسىن تۇراقتى ءارى ءوز دەڭگەيىندە وتكىزۋدىڭ، قالانى كوگالداندىرۋدىڭ، ەكولوگيالىق احۋالدى جاقسارتۋ ءۇشىن كولىك قوزعالىسىن رەتتەۋدىڭ، سونداي-اق، الماتىلىقتاردى الاڭداتاتىن باسقا دا ماسەلەلەردى شەشۋدىڭ ماڭىزىن اتاپ ءوتتى. قالا اكىمى پرەزيدەنتكە جۇرگىزىلگەن جۇمىستار جانە قابىلدانعان شارالار تۋرالى ەكى اپتادا ءبىر رەت بايانداپ وتىرادى»،- دەدى ول.
29 ناۋرىز كۇنى الماتىعا وزبەكستان پرەزيدەنتى شاۆكات ميرزيويوۆ ساپارلاپ، قازاقستان پرەزيدەنتى وعان قالانىڭ كورىكتى ورىندارىن كورسەتكەن. سونىڭ سالدارىنان الماتىدا كوشەلەر جابىلىپ، كوپشىلىك ادەتتەن تىس كوبىرەك كولىك كەپتەلىسىندە تۇرىپ، الەۋمەتتىك جەلىدە شاعىنعان جازبالار جاريالانعان.
