تۇركياداعى رەسپۋبليكالىق حالىق پارتياسىنىڭ جەتەكشىسى وزگۇر وزەل مەرزىمىنەن بۇرىن سايلاۋ وتكىزۋ جانە پرەزيدەنت رەجەپ تايىپ ەردوعانعا سەنىمسىزدىك ءبىلدىرۋ ءۇشىن قول جيناۋ ناۋقانىن باستاعانىن مالىمدەدى، دەپ حابارلايدى “ادىرنا” ۇلتتىق پورتالى Cumhuriyet باسىلىمىنا سىلتەمە جاساپ.
بۇل تۋرالى ول 2,2 ميلليون ادام قاتىسقان «ەكرەم يماموعلىنا بوستاندىق» اتتى جاپپاي ميتينگتە ايتتى.
جوسپارعا سايكەس، ەرتەڭنەن باستاپ ەردوعانعا سەنىمسىزدىك ءبىلدىرۋ مەن كەزەكتەن تىس سايلاۋ وتكىزۋدى قولدايتىن ازاماتتاردان اۋقىمدى تۇردە قول جيناۋدى باستايدى. ناۋقان اياسىندا ەلدىڭ ءارتۇرلى قالالارىندا ميتينگتەر ۇيىمداستىرىلماق.
كومپانيانىڭ ماقساتى – 2023 جىلعى سايلاۋدا ەردوعان العان 27,7 ميلليون داۋىسقا تەڭ قول جيناۋ. وسى باستاما اياسىندا بۇكىل ەل بويىنشا ميتينگتەر وتكىزۋدى جوسپارلاپ وتىر.
وزەل تۇرمەدەگى ساياساتكەرلەر مەن قاماۋداعى بەلسەندىلەرگە قولداۋ ءبىلدىرىپ، ولاردى دەرەۋ بوساتۋعا شاقىردى. ءوز سوزىندە ول ستامبۋل مەرى ەكرەم يماموعلى، ۇلتشىل «جەڭىس» پارتياسىنىڭ (Zafer Partisi) جەتەكشىسى ءۇمىت وزداع جانە 2016 جىلدان بەرى ساياسي مالىمدەمەلەرى ءۇشىن تۇرمەدە وتىرعان كۇرد ساياساتكەرى سەلاحاتتين دەمىرتاش بوستاندىققا شىعۋى كەرەكتىگىن تالاپ ەتتى.
