يزرايل بيلىگى گازا سەكتورىنىڭ وڭتۇستىگىندەگى رافاح قالاسىندا قۇرلىق وپەراتسياسىن باستاعانىن مالىمدەدى، دەپ حابارلايدى “ادىرنا” ۇلتتىق پورتالى 24KZ-كە سىلتەمە جاساپ.
يزرايل قورعانىس ارمياسىنىڭ رەسمي Telegram-كانالىندا بۇل وپەراتسيا ايماقتاعى قاۋىپسىزدىك ايماقتارىن كەڭەيتۋ ماقساتىندا جۇرگىزىلىپ جاتقانى ايتىلعان. سونداي-اق، اسكەري ارەكەتتەر بارىسىندا حاماس قوزعالىسىنىڭ ينفراقۇرىلىم نىساندارى جويىلعانى حابارلاندى.
يزرايل اسكەرى باسقا قالالارعا اۋە سوققىلارىن جالعاستىرۋدا. Al Jazeera تەلەارناسىنىڭ مالىمەتىنشە، سوڭعى تاۋلىكتە بۇل شابۋىلدار سالدارىنان 24 پالەستينالىق قازا تاپقان.
ەسكە سالايىق، يزرايل 18 ناۋرىزدا حاماس-قا قارسى اسكەري قيمىلدارىن قايتا جالعاستىرعان بولاتىن. بۇل شەشىم حاماس قوزعالىسىنىڭ تۇتقىنداردى بوساتۋدان باس تارتىپ، بىتىمگە كەلۋ تۋرالى جاڭا كەلىسىمدى قابىلداماۋىنا بايلانىستى قابىلدانعان.
