ۇلانباتور قالاسىنىڭ ازاماتتار وكىلدەرىنىڭ حۋرالىنىڭ كەزەكتەن تىس بەسىنشى سەسسياسىنىڭ العاشقى تالقىلاۋىندا مەتروپوليتەن قۇرىلىسى جوباسىنىڭ جاڭارتىلعان تەحنيكا-ەكونوميكالىق نەگىزدەمەسىن (تەن) قولداۋ ماسەلەسى كوتەرىلدى، دەپ حابارلايدى “ادىرنا” ۇلتتىق پورتالى مونتسامە-گە سىلتەمە جاساپ.
ازاماتتار وكىلدەرىنىڭ حۋرالى مۇشەلەرىنىڭ باسىم بولىگى بۇل قۇجاتپەن كەلىستى. ناتيجەسىندە ۇكىمەتكە قاۋلى جوباسىن ەنگىزۋ تۋرالى شەشىم قابىلداندى.
ازاماتتار وكىلدەرىنىڭ حۋرالىنىڭ مۇشەسى جانە قارجى-ەكونوميكالىق جوبالار باعدارلاماسىنىڭ ۇيلەستىرۋشىسى ل. حوسباياردىڭ ايتۋىنشا، ەل استاناسىندا مەترو سالۋ باستاماسى العاش رەت 2011 جىلى كوتەرىلىپ، ۇكىمەتتىڭ № 411 قاۋلىسى قابىلدانعان. جوبالاردى باسقارۋ بويىنشا كونسالتينگتىك قىزمەتتەرگە ەكى كەزەڭنەن تۇراتىن تەندەر وتكىزىلىپ، ناتيجەسىندە وڭتۇستىك كورەيانىڭ جەتەكشى كومپانيالارى “Duha Engineering”، “Korail”، “Susong Engineering” جانە “Korea National Railway” كىرەتىن كورەي كونسورتسيۋمى تاڭدالعان. بۇل كونسورتسيۋم ءوز جۇمىسىن وتكەن جىلدىڭ 5 شىلدەسىندە باستاعان.
مەترونىڭ ءبىرىنشى جەلىسى 19,4 كم قاشىقتىققا سوزىلىپ، 15 ستانتسيا مەن ءبىر دەپودان تۇرادى. ول تولگويت پەن امگالاندى “ەنحتايۆان” داڭعىلى ارقىلى بايلانىستىرادى. ونىڭ 19,1 كم بولىگى جانە 14 ستانتسياسى جەر استىندا ورنالاسسا، ءبىر ستانتسيا جەر بەتىندە سالىنادى. تۋننەلدەر مەن ستانتسيالار “استىنان جوعارى” ادىسىمەن جابىق تاسىلدە سالىنباق. ال توننەل قازۋ ماشيناسىنىڭ تەرەڭدىگى 10-25 مەتر ارالىعىندا بولادى. كاسىبي ۇيىمداردىڭ باعالاۋىنشا، مەترو قۇرىلىسىنىڭ جوبالىق قۇنى 2,4 ميلليارد اقش دوللارىن قۇرايدى. ونىڭ 97,7 پايىزى قۇرىلىس جۇمىستارىنا، ال قالعان بولىگى تاپسىرىس بەرۋشى تاراپىنان مونيتورينگ جۇرگىزۋ جانە جەر تەلىمدەرىن بوساتۋ سياقتى باسقا شارالارعا جۇمسالادى.
ل. حوسباياردىڭ ايتۋىنشا، جوبانى قارجىلاندىرۋدىڭ 85 پايىزىن شەتەلدىك كوزدەردەن تارتۋ بويىنشا بەلسەندى جۇمىستار جۇرگىزىلۋدە. ال قالعان 15 پايىزى ەل استاناسىنىڭ بيۋدجەتىنەن بولىنەدى. جوبا 28 موڭعول جانە 56 حالىقارالىق ستاندارتقا سايكەس جۇزەگە اسىرىلادى.
