ۋكراينا پرەزيدەنتى ۆلاديمير زەلەنسكي اقش-تىڭ مينەرالدار تۋرالى كەلىسىمنىڭ جاڭا نۇسقاسىن ۇسىنعانىن جانە ونىڭ جاقىن ارادا راتيفيكاتسيا ءۇشىن پارلامەنتكە جىبەرىلەتىنىن مالىمدەدى، دەپ حابارلايدى "ادىرنا" ۇلتتىق پورتالى.
«بۇل – اقش تاراپىنىڭ اۋقىمدى جانە تولىققاندى كەلىسىمى. بۇرىنعى نەگىزدەمەلىك كەلىسىمنەن كەيىن تولىققاندى قۇجات ازىرلەۋ كەزەڭىنە وتتىك. قازىر اقش بىزگە بىردەن اۋقىمدى كەلىسىم ۇسىندى»، – دەدى زەلەنسكي.
ونىڭ ايتۋىنشا، قۇجاتتىڭ ناقتى مازمۇنى ءالى بەلگىسىز، بىراق اتوم ەلەكتر ستانتسيالارىنا قاتىستى ەشقانداي ماسەلە كوتەرىلمەگەن.
سونىمەن قاتار، زەلەنسكي رەسەي اتىستى توقتاتۋ رەجيمىن بۇزعان جاعدايدا ۋكراينا ترامپ اكىمشىلىگىنەن ناقتى شارالار كۇتەتىنىن اتاپ ءوتتى:
«ەگەر رەسەي كەلىسىمدى بۇزسا، ءبىز پرەزيدەنت ترامپتان سانكتسيالار، قىسىم جانە قارۋ جەتكىزۋدى سۇرايمىز. بىزدە ناقتى دالەلدەر بولادى»، – دەدى ول.
اقش باستاماسىمەن ۋكراينا رەسەيگە جانە وزىنە تيەسىلى كەيبىر ينفراقۇرىلىمدىق نىساندارعا سوققى جاساماۋ تۋرالى ءتىزىم ۇسىندى. رەسەي تاراپى بۇل ۇسىنىستى قابىلداپ، ءوز ءتىزىمىن جاريالادى.
شابۋىل جاساۋعا ۋاقىتشا تىيىم سالىنعان نىساندار قاتارىندا مۇناي وڭدەۋ زاۋىتتارى، مۇناي-گاز قۇبىرلارى مەن قويمالارى، ەلەكتر ەنەرگياسىن ءوندىرۋ جانە تاراتۋ ينفراقۇرىلىمى، اتوم ەلەكتر ستانتسيالارى جانە سۋ ەلەكتر ستانتسيالارىنىڭ بوگەتتەرى بار.
رەسەي تاراپى بۇل موراتوري 2025 جىلدىڭ 18 ناۋرىزىنان باستاپ 30 كۇنگە سوزىلاتىنىن حابارلادى. ال ۋكراينا ازىرگە بۇل شەشىمدى رەسمي تۇردە راستاعان جوق.
«رەسەي الداعى كۇندەرى قانداي ساياسات ۇستاناتىنى كوپ نارسەنى ايقىندايدى. ەگەر قايتادان اۋە دابىلى، قارا تەڭىزدە اسكەري بەلسەندىلىك، رەسەيلىك مانيپۋلياتسيالار بولسا، وندا ماسكەۋگە قارسى جاڭا شارالار قابىلداۋعا تۋرا كەلەدى»، – دەپ جازدى زەلەنسكي ءوزىنىڭ Telegram-ارناسىندا.
