23 ناۋرىزدا ماڭعىستاۋ وبلىسىنىڭ اكىمى نۇرداۋلەت قيلىباي 2018 جىلدان بەرى جۇمىسى تۇرالاپ قالعان بەينەۋ استىق تەرمينالىنىڭ قايتا ىسكە قوسىلۋ جۇمىستارىمەن تانىستى.
بۇل ماڭىزدى ينفراقۇرىلىمدىق جوبانىڭ يەسى “ەۋرازيا ترانس لوگيستيك" جشس. ماڭعىستاۋ وبلىسىنىڭ اكىمدىگى «Halyk» قورىنان قارجى الىپ، "كاسپي" الەۋمەتتىك-كاسىپكەرلىك كورپوراتسياسىمەن بىرلەسە وتىرىپ، استىق تەرمينالىنىڭ قايتا ىسكە قوسىلۋىن قامتاماسىز ەتتى.
جوبا ءوڭىردىڭ ازىق-تۇلىك قاۋىپسىزدىگىن نىعايتىپ، قازاقستاننىڭ ەكسپورتتىق الەۋەتىن ارتتىرۋعا سەپتىگىن تيگىزەدى.
“مەملەكەت باسشىسى قاسىم-جومارت توقاەۆ ماڭعىستاۋ وبلىسىنىڭ الەۋمەتتىك-ەكونوميكالىق دامۋى اياسىندا تەرمينالدى قالپىنا كەلتىرۋدىڭ ماڭىزدىلىعىن اتاپ وتكەن بولاتىن. بەينەۋ استىق تەرمينالىنىڭ قايتا ىسكە قوسىلۋى – ءوڭىر دامۋى ءۇشىن ستراتەگيالىق ماڭىزدى قادام بولىپ وتىر. بۇل جوبا وبلىستىڭ ازىق-تۇلىك تۇراقتىلىعىن قامتاماسىز ەتىپ قانا قويماي، ەكسپورتتىق باعىتتى كۇشەيتىپ، جاڭا جۇمىس ورىندارىن اشادى،” – دەدى وبلىس اكىمى نۇرداۋلەت قيلىباي.
تەرمينالدىڭ قۋاتتىلىعى ءبىر مەزگىلدە 100 مىڭ توننا استىق ساقتاۋعا مۇمكىندىك بەرىپ، تاۋلىگىنە 400 توننا ۇن، جىلىنا 25 000 توننا كەبەك شىعارا الادى.
كاسىپورىننىڭ جۇك اينالىمى جىلىنا 2 ميلليون تونناعا دەيىن جەتىپ، شامامەن 200 جاڭا جۇمىس ورنى اشىلادى دەپ كۇتىلۋدە. ونىمدەر وزبەكستان، تاجىكستان جانە اۋعانستانعا ەكسپورتتالادى.
بەينەۋ تەرمينالىنىڭ زاماناۋي ينفراقۇرىلىمى ونى كاسپي ماڭى ەلدەرىنە قۇرلىق ارقىلى جۇك تاسىمالدايتىن نەگىزگى لوگيستيكالىق ورتالىقتاردىڭ بىرىنە اينالدىرۋعا مۇمكىندىك بەرەدى. بۇل ماڭعىستاۋ وبلىسىنىڭ ەكونوميكالىق الەۋەتىن ارتتىرىپ، حالىقارالىق اۋىل شارۋاشىلىعى ونىمدەرى ساۋداسىنداعى ءرولىن نىعايتادى.
“تيمۋر قۇلىباەۆتىڭ Halyk قورى ماڭعىستاۋ وبلىسىنىڭ دامۋىن جۇيەلى تۇردە قولداپ كەلەدى. ءوڭىر ءۇشىن ماڭىزدى جوبالارعا ينۆەستيتسيا سالۋ – ءبىزدىڭ باستى مىندەتىمىز. 2023 جىلدان بەرى قور بۇل ايماققا 4,5 ميلليارد تەڭگە ءبولدى، ونىڭ ىشىندە 1,8 ميلليارد تەڭگە بەينەۋ استىق تەرمينالىن قالپىنا كەلتىرۋگە باعىتتالدى. بۇل جوبا تەك ينفراقۇرىلىمدىق نىسان عانا ەمەس – ول جاڭا جۇمىس ورىندارى، جەرگىلىكتى كاسىپكەرلەر ءۇشىن تۇراقتىلىق جانە ەلدىڭ ەكسپورتتىق الەۋەتىن نىعايتۋعا ۇلەس قوسادى،” – دەيدى Halyk قورىنىڭ ديرەكتورى ساعىنبەك شۇڭكەەۆ.
2010 جىلى پايدالانۋعا بەرىلگەن بەينەۋ استىق تەرمينالى بۇگىندە تولىق جاڭعىرتىلىپ، مەملەكەت جۇرگىزىپ وتىرعان ازىق-تۇلىك قاۋىپسىزدىگى مەن اگروونەركاسىپتىك ەكسپورتتى دامىتۋ ستراتەگياسىنا سايكەس قايتا ىسكە قوسىلدى. پرەزيدەنت قاسىم-جومارت توقاەۆ تۇراقتى ەكونوميكالىق ءوسىم مەن وڭىرلەردى دامىتۋعا ىقپال ەتەتىن وسىنداي ينفراقۇرىلىمدىق جوبالاردىڭ ماڭىزدىلىعىن بىرنەشە رەت اتاپ وتكەن بولاتىن.
