لوندوننىڭ وڭتۇستىك-شىعىسىنداعى حەيز اۋدانىندا ترانسفورماتور ورتەنىپ، اۋقىمدى ءورت شىقتى. توتەنشە جاعدايعا بايلانىستى الەمدەگى ەڭ ءىرى اۋەجايلاردىڭ ءبىرى — حيتروۋ ءبىر كۇنگە جابىلدى، دەپ حابارلايدى «ادىرنا» ءتىلشىسى حالىقارالىق اگەنتتىكتەرگە سىلتەپ.
«جولاۋشىلار مەن ارىپتەستەرىمىزدىڭ قاۋىپسىزدىگى ءۇشىن حيتروۋ اۋەجايى 21 ناۋرىز ساعات 23.59-عا دەيىن جابىق بولادى. جولاۋشىلاردان اۋەجايعا بارماۋدى سۇرايمىز. قوسىمشا اقپارات الۋ ءۇشىن ءوز اۋە كومپانيالارىڭىزعا حابارلاسىڭىزدار. قولايسىزدىق ءۇشىن كەشىرىم سۇرايمىز»،–دەلىنگەن حيتروۋ اۋەجايىنىڭ ءباسپاسوز قىزمەتى تاراتقان مالىمەتتە.
اپاتتىڭ اۋقىمى كەم دەگەندە 1300 رەيستى كىدىرتتى
قازىرگى ۋاقىتتا ۇلىبريتانيادا وسى اپات سالدارىنان 1300-دەن استام رەيستىڭ كەرى قايتارىلعانى ايتىلادى. ولاردىڭ كەيبىرى مۇحيت ۇستىنەن كەرى قايتۋعا ءماجبۇر.
Flightradar24 رەيسەردى باقىلاۋ ۆەب-سايتىنىڭ مالىمەتىنە قاراعاندا، حيتروۋدىڭ جابىلۋى لوندونعا قوناتىن نەمەسە ودان ۇشىپ شىعاتىن كەمىندە 1,351 رەيسكە اسەر ەتىپ وتىر. بۇل كورسەتكىشتىڭ الدا ارتا ءتۇسۋى مۇمكىن ەكەنى حابارلانۋدا.
ايتا كەتەيىك، لوندوندى الەمنىڭ 180-نەن استام باعىتىمەن بايلانىستىراتىن حيتروۋ اۋەجايىنا 80-نەن استام اۆياكومپانيانىڭ ۇشاعى ۇشادى. تەك اقپان ايىندا عانا حيتروۋعا 5,7 ميلليوننان استام جولاۋشى كەلگەن. سوندىقتان حيتروۋ حالىقارالىق اۋەجايى الەمدەگى ەڭ قاۋىرت جۇمىس ىستەيتىن اۋەجايدىڭ ءبىرى رەتىندە اتالادى.
وتكەن جىلدىڭ وزىندە حيتروۋ اۋەجايى رەكوردتىق 83,9 ميلليون جولاۋشىعا قىزمەت كورسەتتى. بۇل اۋەجايدا ءار 45 سەكۋند سايىن ۇشاقتار ۇشىپ، قونىپ جاتادى.
قازىرگى جاعدايدا كەيبىر رەيستەر لوندونداعى ەكىنشى اۋەجاي گاتۆيك اۋەجايىنا جونەلتىلىپ جاتىر. ال اۋەدە كەلە جاتقاندارى مۇحيتتىڭ ۇستىنەن كەرى بۇرىلىپ كەتىپ جاتىر. كەيبىر رەيستەر پاريج مەن يرلانديا اۋەجايلارىنا دا بەت العانى ايتىلادى.
اۋىلداعى AIR ASTANA دا مازاسىز
حيتروۋداعى ورتكە بايلانىستى Air Astana كومپانياسى دا لوندوننان كەلەتىن جانە لوندونعا ۇشاتىن جولاۋشىلارعا ۇندەۋ جاسادى.
«Air Astana اۋەكومپانياسى الماتى-لوندون جانە لوندون-الماتى باعىتتارىنداعى KC663/664 رەيستەر 21 ناۋرىزدان 22 ناۋرىزعا شەگەرىلگەنىن حابارلايدى. رەيستىڭ كەشىكتىرىلۋىنە ەلەكتر پودستانتسياسىنداعى ءورت سالدارىنان حيتروۋ اۋەجايىندا ەلەكتر قۇرىلعىلارىنىڭ ىستەن شىعۋى سەبەپ بولدى»،– دەپ جازىلعان حابارلامادا.
Sky News دەرەگىنشە، اۋەجايدان شامامەن 2,5 شاقىرىم جەردە ورنالاسقان حەيزدەگى ەلەكتر ستانتسياسى ورتەنگەن. قازىرگى تاڭدا شامامەن 16 مىڭ ادام جارىقسىز وتىر.
