Londonnyń ońtústik-shyǵysyndaǵy Heız aýdanynda transformator órtenip, aýqymdy órt shyqty. Tótenshe jaǵdaıǵa baılanysty álemdegi eń iri áýejaılardyń biri — Hıtroý bir kúnge jabyldy, dep habarlaıdy «Adyrna» tilshisi halyqaralyq agenttikterge siltep.
«Jolaýshylar men áriptesterimizdiń qaýipsizdigi úshin Hıtroý áýejaıy 21 naýryz saǵat 23.59-ǵa deıin jabyq bolady. Jolaýshylardan áýejaıǵa barmaýdy suraımyz. Qosymsha aqparat alý úshin óz áýe kompanııalaryńyzǵa habarlasyńyzdar. Qolaısyzdyq úshin keshirim suraımyz»,–delingen Hıtroý áýejaıynyń baspasóz qyzmeti taratqan málimette.
APATTYŃ AÝQYMY KEM DEGENDE 1300 REISTI KIDIRTTI
Qazirgi ýaqytta Ulybrıtanııada osy apat saldarynan 1300-den astam reıstiń keri qaıtarylǵany aıtylady. Olardyń keıbiri muhıt ústinen keri qaıtýǵa májbúr.
Flightradar24 reıserdi baqylaý veb-saıtynyń málimetine qaraǵanda, Hıtroýdyń jabylýy Londonǵa qonatyn nemese odan ushyp shyǵatyn keminde 1,351 reıske áser etip otyr. Bul kórsetkishtiń alda arta túsýi múmkin ekeni habarlanýda.
Aıta keteıik, Londondy álemniń 180-nen astam baǵytymen baılanystyratyn Hıtroý áýejaıyna 80-nen astam avıakompanııanyń ushaǵy ushady. Tek aqpan aıynda ǵana Hıtroýǵa 5,7 mıllıonnan astam jolaýshy kelgen. Sondyqtan Hıtroý halyqaralyq áýejaıy álemdegi eń qaýyrt jumys isteıtin áýejaıdyń biri retinde atalady.
Ótken jyldyń ózinde Hıtroý áýejaıy rekordtyq 83,9 mıllıon jolaýshyǵa qyzmet kórsetti. Bul áýejaıda ár 45 sekýnd saıyn ushaqtar ushyp, qonyp jatady.
Qazirgi jaǵdaıda keıbir reıster Londondaǵy ekinshi áýejaı Gatvık áýejaıyna jóneltilip jatyr. Al áýede kele jatqandary muhıttyń ústinen keri burylyp ketip jatyr. Keıbir reıster Parıj men Irlandııa áýejaılaryna da bet alǵany aıtylady.
AÝYLDAǴY AIR ASTANA DA MAZASYZ
Hıtroýdaǵy órtke baılanysty Air Astana kompanııasy da Londonnan keletin jáne Londonǵa ushatyn jolaýshylarǵa úndeý jasady.
«Air Astana áýekompanııasy Almaty-London jáne London-Almaty baǵyttaryndaǵy KC663/664 reıster 21 naýryzdan 22 naýryzǵa shegerilgenin habarlaıdy. Reıstiń keshiktirilýine elektr podstanııasyndaǵy órt saldarynan Hıtroý áýejaıynda elektr qurylǵylarynyń isten shyǵýy sebep boldy»,– dep jazylǵan habarlamada.
Sky News dereginshe, áýejaıdan shamamen 2,5 shaqyrym jerde ornalasqan Heızdegi elektr stanııasy órtengen. Qazirgi tańda shamamen 16 myń adam jaryqsyz otyr.
