اقمولا وبلىسىنداعى بەستوبە التىن كەنىشىندە تاۋ ماسساسى وپىرىلىپ، جۇمىسشى قازا تاپتى، دەپ حابارلايدى «ادىرنا» ءتىلشىسى.
تاعى 2 جۇمىسشى ستەپنوگورسك اۋرۋحاناسىنا جەتكىزىلگەن. وبلىستىق پوليتسيا دەپارتامەنتىنىڭ دەرەگىنشە، وقىس جاعداي 19 ناۋرىزدا بولعان.
«بەستوبە» كەنىشىندەگى «زاپادنايا» شاحتاسىندا جۇمىسشىنىڭ ولىمىنە قاتىستى «ابايسىزدا ادام ولىمىنە اكەپ سوققان ەڭبەك قاۋىپسىزدىگى ەرەجەلەرىن بۇزۋ» بابى بويىنشا قىلمىستىق ءىس قوزعالدى»،—دەپ ءتۇسىندىردى وبلىستىق پد.
كەنشىلەر 700 مەتر تەرەڭدىكتە اعاش بەكىتكىشتى ورناتۋ كەزىندە تاۋ جىنىسى قۇلاعان. قازىرگى تاڭدا جازاتايىم جاعدايدىڭ سەبەپتەرىن انىقتاۋ ءۇشىن ءوڭىردىڭ ەڭبەك ينسپەكتسياسى ماماندارىنان ارنايى كوميسسيا قۇرىلدى.
ايتا كەتەيىك، «بەستوبە» كەن ورنى «قازاقالتىن» جشس-عا تيەسىلى، ول ءوز كەزەگىندە «اك التىنالماس» اق-نىڭ ەنشىلەس كومپانياسى. قازاقستانداعى ءىرى التىن ءوندىرۋشى كومپانيالاردىڭ ءبىرى بولىپ سانالاتىن بۇل كاسىپورىننىڭ 67,5% اكتسياسى Gouden Reserves B.V.-گە, ال 22,5% اكتسياسى ميلليونەر ۆلاديمير جۇمانباەۆقا تيەسىلى.
