2024 جىلدىڭ 13 ناۋرىزىندا الماتىداعى شىمبۇلاق تاۋ كۋرورتىندا ەكىنشى رەت حالىقارالىق Shymbulak Freeride Week Qualifier جارىسى وتپەك. بۇل الەم بويىنشا ۇيىمداستىرىلاتىن Freeride World Tour Qualifier ىرىكتەۋ كەزەڭدەرىنىڭ ءبىرى.
جارىستا قاتىسۋشىلار شاڭعى جانە سنوۋبورد ساناتتارى بويىنشا (ەرلەر مەن ايەلدەر اراسىندا) سىنعا تۇسەدى. بيىلعى سايىسقا 95 سپورتشى تىركەلگەن. ولاردىڭ قاتارىندا اۆستراليا، يتاليا، قىتاي، يران، قىرعىزستان، لاتۆيا، پولشا، رەسەي، اقش، تايبەي، فرانتسيا جانە جاپونيا ەلدەرىنىڭ وكىلدەرى بار.
جارىستار وتەتىن ايماق:
بيىلعى FWQ 2 جۇلدىزدى كەزەڭ «شكولنيك» شىڭىنىڭ بەتكەيىندە ۇيىمداستىرىلادى.
FWT جارىستارى جەلىنىڭ كۇردەلىلىگى، تەحنيكا، باقىلاۋ، سەكىرۋ، فليۋيدتىك كريتەريلەرى بويىنشا باعالانادى.
Freeride World Qualifier – ءتۇرلى دەڭگەيدەگى ىرىكتەۋ كەزەڭدەرىنەن تۇراتىن جارىس. وعان قاتىسۋشىلار 1, 2, 3 جانە 4 دەڭگەيلەرىندەگى تۋرنيرلەردە ۇپاي جينايدى. دەڭگەي جوعارى بولعان سايىن، جۇلدەلى ورىن العان سپورتشىلارعا كوبىرەك رەيتينگتىك ۇپاي بەرىلەدى. ماۋسىم سوڭىندا ۇزدىكتەر Freeride World Tour (FWT) جارىسىنا جولداما الادى.
Shymbulak Freeride Week Qualifier – فريرايد سپورتىنىڭ ەليتاسىنا ءوتۋ مۇمكىندىگى، ال Freeride World Tour – تەك ۇزدىك رايدەرلەر سىنعا تۇسەتىن جوعارى دەڭگەيدەگى الەمدىك جارىس.
