قازاقستان پرەمەر-ءمينيسترىنىڭ ورىنباسارى ەرمەك كوشەرباەۆ الماتىدا رەسەيلىك ساياساتكەر ۆلاديمير جيرينوۆسكيگە ەسكەرتكىش ورناتىلمايتىنىن ايتتى، دەپ حابارلايدى "ادىرنا" ۇلتتىق پورتالى.
بۇل تۋرالى ول ماجىلىستە وتكەن بريفينگتە جۋرناليستەردىڭ سۇراقتارىنا جاۋاپ بەرۋ كەزىندە مالىمدەدى.
باق وكىلدەرى الماتىدا جيرينوۆسكيدىڭ مونۋمەنتىن ورناتۋ جوسپارى راس پا دەپ سۇرادى. ويتكەنى بۇل اقپارات قازاقستاندىق جانە رەسەيلىك باسىلىمداردا كەڭىنەن تارالعان ەدى.
— ءسىز بۇعان دەيىن قازاقستاننىڭ رەسەيدەگى ەلشىسى قىزمەتىن اتقاردىڭىز، ال قازىر مادەنيەت پەن ونەر سالاسىن قاداعالايسىز. الماتىدا جيرينوۆسكيگە ەسكەرتكىش ورناتۋ مۇمكىن بە؟ — دەپ سۇرادى جۋرناليست.
— جوق، ارينە! – دەپ قىسقا جاۋاپ بەردى كوشەرباەۆ.
— نەلىكتەن؟ – دەپ ناقتىلادى جۋرناليست.
— ويتكەنى جوق، – دەپ تۇيىندەدى ۆيتسە-پرەمەر.
ءتىلشىنىڭ سودان كەيىنگى انىقتاۋ ءۇشىن قويىلعان سۇراعىنا شەنەۋنىك "جوق دەگەن سوڭ جوق!"-دەپ قىسقا قايىردى.
كوشەرباەۆ ودان ارمەن بۇل تاقىرىپقا قاتىستى باسقا تۇسىنىكتەمە بەرۋدەن باس تارتتى.
ۆلاديمير جيرينوۆسكي الماتىدا دۇنيەگە كەلگەن. ول 2022 جىلعى 6 ساۋىردە 75 جاسىندا ماسكەۋدە قايتىس بولدى. 2024 جىلدىڭ قاراشا ايىندا رەسەي پرەزيدەنتى ۆلاديمير پۋتين ساياساتكەردىڭ تۋعانىنا 80 جىل تولۋىنا وراي مەرەكەلىك ءىس-شارالار وتكىزۋ تۋرالى جارلىققا قول قويعان.
11 ناۋرىزدا بەلگىلى بولعانداي، جوسپارلانعان ءىس-شارالار قاتارىندا رەسەيدىڭ بىرنەشە قالاسىندا جانە الماتىدا جيرينوۆسكيگە ەسكەرتكىش ورناتۋ قاراستىرىلعان.
