Qazaqstan premer-mınıstriniń orynbasary Ermek Kósherbaev Almatyda reseılik saıasatker Vladımır Jırınovskııge eskertkish ornatylmaıtynyn aıtty, dep habarlaıdy "Adyrna" ulttyq portaly.
Bul týraly ol májiliste ótken brıfıngte jýrnalısterdiń suraqtaryna jaýap berý kezinde málimdedi.
BAQ ókilderi Almatyda Jırınovskııdiń monýmentin ornatý jospary ras pa dep surady. Óıtkeni bul aqparat qazaqstandyq jáne reseılik basylymdarda keńinen taralǵan edi.
— Siz buǵan deıin Qazaqstannyń Reseıdegi elshisi qyzmetin atqardyńyz, al qazir mádenıet pen óner salasyn qadaǵalaısyz. Almatyda Jırınovskııge eskertkish ornatý múmkin be? — dep surady jýrnalıst.
— Joq, árıne! – dep qysqa jaýap berdi Kósherbaev.
— Nelikten? – dep naqtylady jýrnalıst.
— Óıtkeni joq, – dep túıindedi vıe-premer.
Tilshiniń sodan keıingi anyqtaý úshin qoıylǵan suraǵyna sheneýnik "Joq degen soń joq!"-dep qysqa qaıyrdy.
Kósherbaev odan ármen bul taqyrypqa qatysty basqa túsinikteme berýden bas tartty.
Vladımır Jırınovskıı Almatyda dúnıege kelgen. Ol 2022 jylǵy 6 sáýirde 75 jasynda Máskeýde qaıtys boldy. 2024 jyldyń qarasha aıynda Reseı prezıdenti Vladımır Pýtın saıasatkerdiń týǵanyna 80 jyl tolýyna oraı merekelik is-sharalar ótkizý týraly jarlyqqa qol qoıǵan.
11 naýryzda belgili bolǵandaı, josparlanǵan is-sharalar qatarynda Reseıdiń birneshe qalasynda jáne Almatyda Jırınovskııge eskertkish ornatý qarastyrylǵan.
