حرومتاۋداعى شاحتادا جاراقات العان شاحتەر قايتىس بولدى، دەپ حابارلايدى "ادىرنا" ۇلتتىق پورتالى «دياپازون» باسىلىمىنا سىلتەپ.
«كۇيىك شالعان ەكى ەر ادام حرومتاۋ اۋرۋحاناسىنىڭ تراۆماتولوگيا بولىمىنە جاتقىزىلدى، بىرەۋى ۇيىنە جىبەرىلدى، تاعى ءبىر ادام رەانيماتسياعا ءتۇسىپ، كەيىن سانيتارلىق اۆياتسيا ارقىلى وبلىستىق كوپسالالى اۋرۋحاناعا جەتكىزىلدى»، – دەلىنگەن حابارلامادا.
بەلگىلى بولعانداي، ەر ادام 28 اقپاندا «بولاشاق» شاحتاسىندا ءۇش ارىپتەسىمەن بىرگە جاراقات العان. ولار بۇرعىلاۋ جۇمىستارى كەزىندە ءتۇرلى دارەجەدەگى كۇيىك العان. شاحتادا قىسقا مەرزىمدى اۋا قوسپاسىنىڭ تۇتانۋى ورىن العان. جاراقات العان جۇمىسشىلار بىردەن جەر بەتىنە شىعارىلىپ، شاحتادا بولعان 228 ادام قاۋىپسىز جەرگە ەۆاكۋاتسيالاندى. قازىرگى ۋاقىتتا شاحتا جۇمىسى ۋاقىتشا توقتاتىلعان.
«ناۋقاسقا قارقىندى شوكقا قارسى تەراپيا مەن كومبۋستيولوگيالىق كومەك كورسەتىلدى. ول جاساندى تىنىس الۋ اپپاراتىنا قوسىلدى. الايدا 7 ناۋرىزدا قايتىس بولدى»، – دەپ حابارلادى دەنساۋلىق ساقتاۋ باسقارماسى.
حرومتاۋ اۋداندىق اۋرۋحاناسى قالعان ەكى زارداپ شەككەن ادامنىڭ ۇيىنە شىعارىلعانىن مالىمدەدى.
قازىرگى تاڭدا پوليتسيا بۇل وقيعاعا قاتىستى «تاۋ-كەن نەمەسە قۇرىلىس جۇمىستارى كەزىندە قاۋىپسىزدىك ەرەجەلەرىن بۇزۋ» بابى بويىنشا سوتقا دەيىنگى تەرگەۋ جۇرگىزىپ جاتىر.
