استانا قالاسىنىڭ مامانداندىرىلعان اۋدانارالىق ەكونوميكالىق سوتى ادىلەت دەپارتامەنتىنىڭ "Biz Birgemiz Qazaqstan 2030" قوعامدىق بىرلەستىگىن تاراتۋ تۋرالى تالابىن قارادى، دەپ حابارلايدى "ادىرنا" ۇلتتىق پورتالى.
ءىس ماتەريالدارىنا سايكەس، بۇل زاڭدى تۇلعا العاش رەت 2021 جىلعى 11 قازاندا مەملەكەتتىك تىركەۋدەن وتكەن.
"قۇرىلتايشىلار تىزىمىندە 10 ادامنىڭ اتى-ءجونى كورسەتىلگەن، ولاردىڭ ەسىمدەرى قۇرىلتاي جينالىستارىنىڭ حاتتامالارىندا جازىلعان، ونىڭ ىشىندە قايرات پەريزاتتىڭ دا اتى اتالادى", – دەلىنگەن سارسەنبى كۇنى سوت تاراتقان حابارلامادا.
تەرگەۋ بارىسىندا جۇرگىزىلگەن قولتاڭبا ساراپتاماسىنىڭ قورىتىندىسىنا سايكەس، 10 قۇرىلتايشىنىڭ 9-ىنىڭ ورنىنا قۇجاتتارعا قايرات پەريزات قول قويعان.
قازاقستان رەسپۋبليكاسى ازاماتتىق كودەكسىنىڭ 49-بابىنا سايكەس، ەگەر زاڭدى تۇلعانىڭ قۇرىلۋى كەزىندە زاڭ بۇزۋشىلىقتارعا جول بەرىلگەن بولسا جانە ولاردى جويۋ مۇمكىن بولماسا، سوت شەشىمىمەن ونىڭ قىزمەتى توقتاتىلادى.
سونىمەن قاتار، قر جوعارعى سوتىنىڭ "سوتتاردىڭ سالىق زاڭناماسىن قولدانۋدىڭ كەيبىر ماسەلەلەرى تۋرالى" نورماتيۆتىك قاۋلىسىنىڭ 12-تارماعىنا سايكەس، زاڭدى تۇلعانى تىركەۋ نەمەسە قايتا تىركەۋ كەزىندە كورسەتىلگەن باسشى جانە (نەمەسە) قۇرىلتايشى (قاتىسۋشى) ونىڭ قۇرىلۋىنا قاتىسپاعان جاعدايدا، بۇل ۇيىمدى تاراتۋعا نەگىز بار.
وسىعان بايلانىستى، سوت "Biz Birgemiz Qazaqstan 2030" قوعامدىق بىرلەستىگىن ءماجبۇرلى تۇردە تاراتۋ تۋرالى شەشىم قابىلدادى.
الايدا، شەشىم ءالى زاڭدى كۇشىنە ەنگەن جوق.
