«قازاقمىس» كورپوراتسياسى حيميالىق زەرتحانالار باسقارماسىنىڭ بۇرىنعى باسشىسى باقىت ءادىلوۆا «كومپانيا سيرەك كەزدەسەتىن مەتالداردى ەلدەن ەكسپورتتايدى» دەگەن مالىمدەمە جاسادى. بۇل تۋرالى ول «گيپەربورەي» باعدارلاماسىندا ايتتى، دەپ حابارلايدى «ادىرنا» ءتىلشىسى.
ەكس-قىزمەتكەر كورپوراتسيانىڭ حيميالىق ساراپتاما جۇرگىزبەستەن، قۇرامىندا باعالى جانە سيرەك جەر مەتالدارى بار كەن مەن مىس كونتسەنتراتىن سىرتقا شىعارىپ جاتقانىن اتاپ ءوتتى. ايتۋىنشا، بۇل ءتاسىل شيكىزاتتىڭ ناقتى باعاسىن جاسىرۋ ارقىلى ونىڭ قۇنىن جاساندى تۇردە تومەندەتۋگە جانە ۇلتتىق ەكونوميكاعا زيان كەلتىرۋگە باعىتتالعان.
باقىت ءادىلوۆا الەمدە مەتالداردى ەسەپكە الۋ ءۇشىن جوعارى دالدىكتەگى حيميالىق تالداۋ ادىستەرى قولدانىلاتىنىن، ال «قازاقمىس» تەك رەنتگەنسپەكترالدىق ەكسپرەسس-تالداۋ ءادىسىن پايدالانعانىن العا تارتتى.
«قاراپايىم جۇمىسشىدان باستاپ، كاسىپورىن باسشىسىنا دەيىن رەنتگەنسپەكترالدىق ءادىستىڭ ناقتى ەمەس، جارتىلاي ساندىق تالداۋ ءادىسى ەكەنىن بىلەدى. جوعارى قاتەلىككە بايلانىستى بۇل ءادىس تەك تەحنولوگيالىق پروتسەستى تۇزەتۋ ءۇشىن عانا قولدانىلادى. ال مەتالل ەسەپكە الۋ جانە ءوزارا ەسەپ ايىرىسۋ ءۇشىن جوعارى دالدىكتەگى حيميالىق تالداۋ ادىستەرى قولدانىلادى»،—دەپ ءتۇسىندىردى ول.
ءادىلوۆا كورپوراتسيانىڭ جەزقازعانداعى رەنتگەنوسپەكترالدى زەرتحانانى زاڭسىز اككرەديتاتسيادان وتكىزگەنىن مالىمدەدى.
«بۇل – اككرەديتاتسيا تۋرالى زاڭدى تىكەلەي بۇزۋ عانا ەمەس، سونداي-اق كەن مەن ونى قايتا وڭدەۋ ونىمدەرىندەگى مەتالدار قۇرامىن بۇرمالاۋدى زاڭداستىرۋ بولىپ ەسەپتەلەدى. سونداي-اق ەكسپورتتالاتىن شيكىزاتقا رەنتگەنوسپەكترالدىق ادىسپەن جۇرگىزىلگەن سەرتيفيكاتتاۋ تالداۋلارىنا قاتىستى دالەلدى قۇجاتتار قۇقىق قورعاۋ ورگاندارىنا تاپسىرىلدى»،—دەدى ول.
الايدا «قازاقمىس» كورپوراتسياسى بۇل ايىپتاۋلاردى جوققا شىعاردى.
«سيرەك كەزدەسەتىن مەتالداردىڭ قۇرامىن جاسىرۋ، سونداي-اق ەكسپورتتالاتىن شيكىزات قۇنىن جاساندى تۇردە تومەندەتۋ تۋرالى مالىمدەمەلەر شىندىققا جاناسپايدى»،— دەپ مالىمدەدى كومپانيا.
ايتۋلارىنشا، كورپوراتسيا سيرەك كەزدەسەتىن مەتالداردى ماقساتتى تۇردە وندىرۋمەن اينالىسپايدى، ال ونىڭ قىزمەتى ۇلتتىق جانە حالىقارالىق ستاندارتتارعا تولىق سايكەس كەلەدى.
