كوكشەتاۋدا العىس ايتۋ كۇنى مەن قازاقستان حالقى اسسامبلەياسىنىڭ 30 جىلدىعىنا ارنالعان «بىرلىك پەن كەلىسىمنىڭ 30 جىلى» فورۋمى ءوتتى.
ءىس-شارا قازاقستان حالقى اسسامبلەياسىنىڭ 30 جىلدىعىنا ارنالعان ەسكەرتكىش تاقتانىڭ اشىلۋىمەن باستالدى. اشىلۋ راسىمىنە اقمولا وبلىسىنىڭ اكىمى مارات احمەتجانوۆ، اسسامبلەيا ارداگەرلەرى جانە اعا بۋىن وكىلدەرى قاتىستى.
وبلىس اكىمى قاتىسۋشىلارعا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قۇتتىقتاۋ حاتىن وقىپ بەردى.
جينالعان قاۋىم الدىندا ءسوز سويلەگەن مارات احمەتجانوۆ قازاقستاننىڭ بەيبىتشىلىك پەن كەلىسىمنىڭ جارقىن ۇلگىسى ەكەنىن اتاپ ءوتتى. سونداي-اق، قازاقستان حالقى اسسامبلەياسى – ەل بىرلىگىن، دوستىق پەن تۇراقتىلىقتى نىعايتۋعا ىقپال ەتەتىن بىرەگەي ينستيتۋت ەكەنىن ايتىپ، اسسامبلەيا مۇشەلەرىنە جانە كوپۇلتتى قوعامنىڭ دامۋىنا ولشەۋسىز ۇلەس قوسىپ جۇرگەن ازاماتتارعا العىسىن ءبىلدىردى.
«اقمولا وبلىسىنداعى ەتنومادەني بىرلەستىكتەر دە ۇلتتار اراسىنداعى دوستىق پەن ىنتىماقتاستىقتى نىعايتا وتىرىپ، ەل بىرلىگىن بەكەمدەۋگە زور ۇلەس قوستى»– دەپ اتاپ ءوتتى م. احمەتجانوۆ.
ءىس-شارا بارىسىندا ەتنومادەني بىرلەستىكتەر مەن قوعامدىق ۇيىمداردىڭ بەلسەندى مۇشەلەرى ماراپاتتالدى. ولاردىڭ قاتارىندا اقمولا وبلىستىق قازاقستان حالقى اسسامبلەياسىنىڭ ارداگەرلەرى امانگەلدى سىزدىقوۆ پەن جامۇل مۇسحانوۆ بار.
«قازاقستان حالقى اسسامبلەياسى – ءارتۇرلى ۇلت وكىلدەرى تاتۋ-ءتاتتى ءومىر سۇرەتىن ەرەكشە الاڭ. بىرلىك پەن كەلىسىم – ەلىمىزدىڭ تۇراقتىلىعى مەن وركەندەۋىنىڭ نەگىزى. ءبىز بۇل قۇندىلىقتاردى ساقتاپ، كەلەر ۇرپاققا جەتكىزۋىمىز كەرەك»،– دەپ اتاپ ءوتتى ول.
فورۋم ءوڭىردىڭ شىعارماشىلىق ۇجىمدارى قاتىسقان كونتسەرتتىك باعدارلامامەن اياقتالدى.
ايتا كەتەيىك، اقمولا وبلىستىق اسسامبلەياسى قۇرامىندا 40-تان استام ەتنومادەني بىرلەستىك، 104 انالار كەڭەسى، 21 اقساقالدار كەڭەسى بار. سونىمەن قاتار، وڭىردە عىلىمي-ساراپتامالىق توپ، مەدياتسيا كابينەتى، جۋرناليستەر كلۋبى، ساندىك-قولدانبالى ونەر شەبەرلەرىنىڭ وداعى، «اسسامبلەيا جاستارى» رەسپۋبليكالىق قوعامدىق بىرلەستىگىنىڭ وڭىرلىك وكىلدىگى، مەملەكەتتىك ءتىلدى ناسيحاتتاۋ جانە دامىتۋ ورتالىعى، كاسىپكەرلەر قاۋىمداستىعى جۇيەلى تۇردە جۇمىس ىستەيدى.
