اقتوبە وبلىسىندا حرومتاۋداعى دون تاۋ-كەن بايىتۋ كومبيناتىنىڭ شاحتاسىندا توتەنشە جاعداي ورىن الدى. 28 اقپاندا شاحتانىڭ ءوندىرۋ بلوگىندا بۇرعىلاۋ جۇمىستارى كەزىندە سۋتەگى بولىنۋىنە بايلانىستى ءتورت كەنشى زارداپ شەكتى، دەپ حابارلايدى "ادىرنا" ۇلتتىق پورتالى.
وبلىستىق دەنساۋلىق ساقتاۋ باسقارماسىنىڭ مالىمەتىنشە، جاراقات العان ءتورت قىزمەتكەر حرومتاۋ اۋداندىق اۋرۋحاناسىنا جەتكىزىلگەن.
"زارداپ شەككەندەردىڭ ەكەۋى تراۆماتولوگيا بولىمىنە جاتقىزىلدى، بىرەۋى امبۋلاتوريالىق ەم قابىلداۋ ءۇشىن ۇيىنە جىبەرىلدى، ال ءبىر كەنشى اۋىر حالدە جانساقتاۋ بولىمىندە جاتىر. ولارعا بارلىق قاجەتتى مەديتسينالىق كومەك كورسەتىلۋدە", – دەپ مالىمدەدى باسقارما وكىلى.
اقتوبە وبلىستىق پوليتسيا دەپارتامەنتىنىڭ حابارلاۋىنشا، اتالعان وقيعاعا قاتىستى سوتالدى تەرگەۋ باستالدى.
"تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ فاكتىسى بويىنشا سوتالدى تەرگەۋ جۇرگىزىلۋدە", – دەدى ۆەدومستۆو وكىلدەرى.
ايتا كەتەيىك، 2025 جىلدىڭ 17 اقپانىندا ۇلىتاۋ وبلىسىنداعى "جومارت" كەنىشىندە شاحتا وپىرىلىپ، جەتى كەنشى ءۇيىندى استىندا قالعان ەدى. 18 اقپاندا توتەنشە جاعدايلار مينيسترلىگى ولاردىڭ مۇردەلەرى تابىلعان.
