بولگاريانىڭ سوفيا قالاسىندا ءوتىپ جاتقان بوكستان ستراندجا كۋبوگىندا قازاقستاندىق سپورتشى ماحمۇد سابىرحان جارىستان شەتتەتىلدى، دەپ حابارلايدى "ادىرنا" ۇلتتىق پورتالى.
54 كەلى سالماقتا سىنعا ءتۇسۋى ءتيىس بولعان سابىرحان بۇگىن كوسوۆو ەلىنىڭ وكىلى باشكيم بايوكۋعا قارسى جەكپە-جەك وتكىزۋ كەرەك ەدى. الايدا دارىگەرلەر بوكسشىعا شارشى الاڭعا شىعۋعا رۇقسات بەرمەدى.
"بوكسشى تاعامدىق ينفەكتسيا جۇقتىرعان. وعان 3 ناۋرىزعا دەيىن جارىستارعا قاتىسۋعا تىيىم سالىنادى", – دەپ جازىلعان مەديتسينالىق انىقتامادا.
ايتا كەتەيىك، ستراندجا حالىقارالىق ءتۋرنيرى – الەمدەگى ەڭ بەدەلدى دودالاردىڭ ءبىرى سانالادى جانە "كىشى الەم چەمپيوناتى" مارتەبەسىنە يە. كەشە قازاقستان ۇلتتىق قۇراماسىنىڭ 4 بوكسشىسى جارىستى ەرتە اياقتادى. بۇگىن رينگكە 18 قازاقستاندىق بوكسشى شىعادى.
