دەپۋتات داۋلەت مۇقاەۆتىڭ ايتۋىنشا استاناداعى باس مەشىت پەن حازىرەت سۇلتان مەشىتىندە جانازا اسىنا ارنالعان داستارقان ادام باسىنا 20 000 تەڭگەگە دەيىن جەتەدى. مينيمالدى باعا 7000 تەڭگەدەن باستالادى، بىراق ول كەزدە ەتتى ءوزىڭىز اكەلۋىڭىز كەرەك.
بۇل جاعداي كوپشىلىكتىڭ نارازىلىعىن تۋدىرىپ وتىر.
سەبەبى ەلىمىزدىڭ شىعىس قازاقستان، اباي، پاۆلودار وبلىستارىندا جانازا اسى قاراپايىم ۇيىمداستىرىلىپ، تەك 7 ءتۇرلى تاعامنان اسپايدى، ال باسقا تاعامداردى ۇسىنبايدى.
قازاق داستۇرىندە جانازا اسى – مارقۇمعا دۇعا باعىشتاپ، قايعىنى ءبولىسۋ ءۇشىن بەرىلەتىن اس. بىراق مەشىتتەردە باعالاردىڭ شارىقتاۋى جانازا اسىنىڭ توي داستارقانىنا اينالعانىن كورسەتەدى.
دەپۋتاتتىڭ ايتۋىنشا، قازاقستان مۇسىلماندارى ءدىني باسقارماسى (قمدب) بۇل ماسەلەگە كوڭىل ءبولىپ، اس بەرۋ مادەنيەتىن رەتتەۋى ءتيىس. سەبەبى قايعىدان قان جۇتىپ وتىرعان جاندارعا مۇنداي باعالار اۋىر سوققى بولۋى مۇمكىن.
"ەرتە مە، كەش پە، ءار ادام بۇل ومىردەن وتەدى. جانازا، اس بەرۋ، زيرات كوتەرۋ – كەز كەلگەن ادامنىڭ الدىنان شىعاتىن ءدىني جورالعىلار. بىراق ولاردى ورىنداۋ وتباسىعا اۋىر قارجىلىق جۇك بولماۋى ءتيىس" دەدى داۋلەت مۇقاەۆ.
